काठमाडौं । नेपाली कांग्रेसका नेता गुरुराज घिमिरेले पार्टी केन्द्रीय समितिको बैठक अनावश्यक रूपमा लामो बनाइएर पनि कुनै ठोस निर्णय ननिस्किएको भन्दै नेतृत्वमाथि कडा आलोचना गरेका छन् । विशेष महाधिवेशन माग गर्दै आयोजित भेला सम्बोधन गर्दै उनले कांग्रेसको निर्णय–क्षमता र नेतृत्व शैली नै प्रश्नवाचक बनेको टिप्पणी गरेका छन् ।

असोज २८ गतेदेखि निरन्तर चलिरहेको केन्द्रीय समिति बैठकले विशेष महाधिवेशन गर्ने कि नियमित महाधिवेशन भन्ने विषयमा समेत निष्कर्ष निकाल्न नसकिरहेको उल्लेख गर्दै घिमिरेले भने, ‘हामी आफै बिग्रिएका हौं । सच्चिएर अघि बढ्ने तरिका खोज्नुपर्ने बेलामा बैठकलाई विश्वकै लामो बनाइ दियौं ।’ उनका अनुसार एकजना नेताले संसारमा सबैभन्दा लामो समयसम्म बसेका पार्टी बैठकहरूबारे खोज्दा चिनियाँ कम्युनिस्ट पार्टीको बैठक २३ दिन मात्र चलेको देखिएको छ । ‘हाम्रो त डेढ महिना । भोलि पनि बस्ने भनिएको छ, सर्ने हल्ला पनि छ, त्यो हल्ला पनि यहाँ प्रायः सत्य हुन्छ’, उनले कटाक्ष गरे ।

घिमिरेले मुलुक र पार्टी दुबैलाई निकास दिन विशेष महाधिवेशन नै एक मात्र विकल्प रहेको दाबी गरे । विगतमा समयमै महाधिवेशन हुन नसकेका घटना स्मरण गर्दै उनले नेतृत्वले विधानअनुसार चल्न नसकेको आरोप लगाए । ‘हामीले ३ वर्षअघि नै महाधिवेशन प्रक्रिया अघि बढाउन भनेका थियौँ, तर सुन्न पनि चाहिएन’, उनले भने । उनका अनुसार विशेष महाधिवेशनको मागसहित २,४८८ जनाको हस्ताक्षर केन्द्रमा बुझाइसकिएको छ । ‘यो झगडा होइन, अनुशासनहीनता पनि होइन । संस्थापकहरूले देखाएको बाटो अनुशरण गर्ने प्रयास मात्र हो’, उनले स्पष्ट पारे ।

३६ वर्षसम्म विभिन्न चरणमा सरकार सञ्चालन गरेको कांग्रेसले अब आफ्नै कमजोरी र विफलताको खुला समीक्षा गर्नुपर्ने अवस्था समेत आएको उनले बताए । पार्टीभित्रको समस्याको सामाधान विशेष महाधिवेशनबाट मात्र सम्भव हुने उनको तर्क थियो । प्रदर्शनीमार्गस्थित राष्ट्रिय सभागृहमा आयोजित भेलाको अध्यक्षता कांग्रेसको २०१४ सालको पहिलो विशेष महाधिवेशनमा उपस्थित वरिष्ठ नेता ओमकार श्रेष्ठले गरेका थिए । कार्यक्रममा विशेष महाधिवेशन पक्षधर नेताको बाक्लो उपस्थिति थियो ।