धनगढी । नेपाली कम्युनिष्ट पार्टीका सह–संयोजक माधवकुमार नेपालले पार्टी नेता–कार्यकर्तालाई आफू र प्रचण्ड प्रधानमन्त्री भएका समयमा गरेका कामदेखि हालसम्म खेलिएको राजनीतिक भूमिकालाई जनतामाझ पुर्‍याउन निर्देशन दिएका छन् । धनगढीमा आयोजित एकता सन्देश सभालाई सम्बोधन गर्दै उनले नयाँ पुस्तालाई सही राजनीतिक दिशा दिन नेताहरूले आफ्ना कामबारे पारदर्शी रूपमा जनतासामु जानुपर्ने बताए ।

पूर्व प्रधानमन्त्री नेपालले विशेषतः जेनजी आन्दोलनपछि उत्पन्न राजनीतिक संकटका क्षणहरू स्मरण गर्दै आफू र प्रचण्ड राष्ट्रपति कार्यालयमै बसेर रातभर देशलाई जोगाउने प्रयासमा सक्रिय रहेको दाबी गरे । उनले भने, ‘राष्ट्रपतिले हामीलाई सम्झनु भयो, अरू नेताहरूको अत्तोपत्तो थिएन । हामी पुग्यौं, देशलाई संकटबाट जोगाउन भूमिका खेल्यौं ।’

उनले हालका प्रधानमन्त्रीलाई पनि निष्पक्ष चुनाव गराउन प्रोत्साहन प्रदान गरिएको उल्लेख गर्दै सबै नेता एउटै ढर्राका नभएको, राम्रो सोच र काम गर्ने नेतृत्व पनि देशमा रहेको स्पष्ट पार्न आग्रह गरे । एमाले अध्यक्ष केपी शर्मा ओलीलाई संकेत गर्दै उनले आफू मात्रको प्रशंसा चाहने प्रवृत्तिले राजनीतिमा नकारात्मक प्रभाव पार्ने टिप्पणी गरे । सुदूरपश्चिममा आफ्नो पार्टी पहिलो शक्ति बन्ने विश्वास समेत व्यक्त गरे ।

सोही सभामा नेपालले आफ्नो पार्टीले स्वच्छ राजनीतिको मार्गचित्र तयार पारिसकेको उल्लेख गरे । वर्तमान दलहरूमा दलालीकरण, ठेकेदारीकरण, व्यापारीकरण, भ्रष्टीकरण र अपराधीकरण हावी भएकाले देश कुशासन र भ्रष्टाचारको चपेटामा परेको उनको तर्क थियो ।
‘अहिले देशमा कुशासन र भ्रष्टाचार व्याप्त छ । यसलाई अन्त्य गर्ने जिम्मा हाम्रो पार्टीले लिनेछ’, उनले भने, ‘राजनीतिमा लाग्नेहरूमा इमानदारी, समर्पण र देश बनाउने हुटहुटी नहुँदा विकास थिलथिलो भएको हो । हामीलाई देश र जनताको चिन्ता छ, त्यसैले स्वच्छ राजनीतिको नेतृत्व हामीले गर्नुपर्छ ।’

नेपालले एकीकृत पार्टी बनेपछि सबै नेताले सबैको कामको प्रचार गर्नुपर्नेमा जोड दिए । उनका अनुसार जनतामा सकारात्मक सन्देश पुर्‍याउन र देशलाई सही दिशामा डोर्याउन नेतृत्वको सामूहिक भूमिकाबारे जानकारी फैलाउनु आवश्यक छ । उनले नयाँ पुस्ता-विशेषतः जेन जेडलाई निराशाबाट उठाएर सकारात्मक राजनीतिक सहभागितातर्फ प्रेरित गर्न पनि पार्टी प्रतिबद्ध रहेको बताए ।