काठमाडौं । वागमती प्रदेशका मुख्यमन्त्री ईन्द्रबहादुर बानियाँले राज्यले निर्माण व्यवसायीमाथि आतंक बढाएको टिप्पणी गरेका छन् । शुक्रवार काठमाडौंमा आयोजित वागमती प्रदेश निर्माण व्यवसायी महासंघको पाँचौ वार्षिक साधारण सभामा बोल्दै उनले सो कुरा बताएका हुन् ।

मुख्यमन्त्री बानियाँले विकास, निर्माणको कार्यलाई अघि बढाउने नाममा स्टन्टबाजी नगर्न पनि तीन वटै तहका सरकारले सचेत गराए । उनले विधि र प्रक्रिया नपुर्‍याई टेन्डर आह्वान गर्ने कामले पनि विकास, निर्माणको कामले गति लिन नसकेको बताए । मुख्यमन्त्री बानियाँले निर्माण व्यवसायीहरुलाई बैंकहरु पनि पछिल्लो समय दुःख दिने गरेको समेत बताए ।

उनले भने, ‘निर्माण व्यवसायीमाथि अहिले समय समयमा राज्यको आतंक बढेको छ । एउटा मानवीय व्यवहार पनि नरहेको अवस्था छ । कहीँ निर्माण व्यवसायीहरुको आफ्नो त्रुटी होला । कहीँ राज्यको त्रुटी होला । दुवै पक्षको त्रुटीलाई सुधार गरेर देश, प्रदेश र स्थानीय तहलाई तीन तहको सरकारले गर्ने कार्य र टेन्डर प्रक्रियालाई व्यवस्थित गरेर लैजानु पर्दछ । देश स्टन्टबाजीले चल्दैन ।’

उनले भने, ‘विधिको शासन र कानूनी राज्य छ देशमा । कानूनलाई परिमार्जन गरौ । तर स्टन्टबाजीलाई बन्द गरौँ । निर्माण व्यवसायीहरुले विभिन्न ठाउँमा दुःख पाएको अवस्था छ । कहीँ निर्माण व्यवसायीहरुको कमजोरी होला । देशको मन्त्री, प्रधानमन्त्री, प्रदेशका मुख्यमन्त्री, मन्त्री, चाहे गाउँपालिकाका अध्यक्ष जो कसैलाई पनि आफनो काम देखाउनुछ भनेर भटाभट टेण्डर निकाल्ने काम पनि गर्नु हुँदैन ।’ मुख्यमन्त्री बानियाँले प्रधानमन्त्री, मन्त्रीले समेत आफूले काम गरेको देखाउनका लागि गैरकानूनी ढंगले टेन्डर आह्वान गर्नेलगायतका कामहरु गरिरहेको भन्दै आपत्ति जनाए ।