काठमाडौं । नेपाली कांग्रेसभित्र देखिएको आन्तरिक रस्साकस्सीलाई सहमतिमा टुंग्याउने प्रयास तीव्र बनेको छ । पार्टीको विशेष महाधिवेशन पक्षले संस्थापन समूहसँग वार्ताका लागि आठ बुँदे नयाँ प्रस्ताव अघि सारेको छ । जसमा महामन्त्री गगनकुमार थापालाई भावी प्रधानमन्त्रीको उम्मेदवार घोषणा गरेर अघि बढ्ने प्रमुख प्रस्ताव समेटिएको छ ।

केन्द्रीय कार्यसमितिको बैठकका लागि सानेपा पुगेका कार्यवाहक सभापति पूर्णबहादुर खड्कालाई महामन्त्री विश्वप्रकाश शर्माले सहमतिका लागि तयार पारिएको प्रस्ताव पठाएका हुन् । खड्काको कार्यकक्षमा उक्त प्रस्तावमाथि गम्भीर छलफल भइरहेको कांग्रेसका एक नेताले जानकारी दिएका छन् । उनका अनुसार पार्टीभित्र देखिएको विवादलाई संवादमार्फत समाधान गर्ने उद्देश्यले प्रस्ताव ल्याइएको हो । यसअघि कांग्रेस सभापति शेरबहादुर देउवा निवासमा भएको छलफलमा महामन्त्रीद्वय गगन थापा र विश्वप्रकाश शर्माले देउवालाई सक्रिय राजनीतिबाट केही समय विश्राम लिन आग्रह गरेका थिए । उनीहरूले आउँदो प्रतिनिधि सभा निर्वाचनमा टिकट वितरणको प्रक्रिया कार्यवाहक सभापतिको हस्ताक्षरबाट हुने व्यवस्था गर्नुपर्ने माग अघि सारेका थिए ।

त्यसैगरी, सभापति देउवाले आगामी आम निर्वाचनमा उम्मेदवार नबन्ने घोषणा गर्नुपर्ने र विशेष महाधिवेशनले गरेका निर्णयलाई औपचारिक मान्यता दिनुपर्ने माग पनि उठाइएको थियो । जवाफमा देउवाले वैशाखमा तय भएको १५औं महाधिवेशनपछि आफू स्वतः नेतृत्वबाट बाहिरिने भन्दै तीन महिना कुर्न आग्रह गरेका थिए । यद्यपि, चुनाव नलड्ने विषयमा उनले स्पष्ट प्रतिबद्धता जनाएका थिएनन् ।

संस्थापन पक्षले अन्य मागका हकमा भने केही लचकता देखाएको नेताहरू बताउँछन् । विशेष गरी, आउँदो प्रतिनिधि सभा निर्वाचनका लागि टिकट वितरण गर्दा कार्यवाहक सभापतिको हस्ताक्षर रहने विषयमा सकारात्मक संकेत दिएको बताइएको छ । यही आधारलाई केन्द्रमा राख्दै महामन्त्री शर्माले सहमतिका लागि नयाँ प्रस्ताव तयार पारेर पठाएका हुन् । विशेष महाधिवेशन पक्षको आठ बुँदे प्रस्तावमा संगठनात्मक सुधार, नेतृत्व हस्तान्तरणको स्पष्ट खाका र भावी राजनीतिक दिशाबारे सहमति खोजिएको छ ।

त्यसमध्ये सबैभन्दा चासोको विषय गगनकुमार थापालाई कांग्रेसको तर्फबाट प्रधानमन्त्रीको उम्मेदवार घोषणा गरेर चुनावमा जाने प्रस्ताव हो । यसले पार्टीभित्र नयाँ पुस्ताको नेतृत्वलाई अघि सार्ने सन्देश दिने नेताहरूको तर्क छ । कांग्रेसभित्र चलिरहेको यो संवाद र प्रस्तावमाथिको छलफलले पार्टीको आगामी महाधिवेशन, निर्वाचन रणनीति र नेतृत्व संरचनामा निर्णायक प्रभाव पार्ने अपेक्षा गरिएको छ। सहमति जुटेमा कांग्रेस आन्तरिक विवादबाट बाहिर निस्कँदै एकीकृत रणनीतिसहित चुनावी मैदानमा उत्रने संकेत देखिएको छ ।

हेर्नुस् आठ बुँदे नयाँ प्रस्ताव

–कार्यकारी भूमिकाबाट सभापति शेरबहादुर देउवा बाहिरिनु पर्ने ।
–विशेष महाधिवेशनको स्वामित्व लिनुपर्ने ।
–प्रधानमन्त्रीको उम्मेदवार तय गरेर जानुपर्ने ।
–चुनावी गठबन्धन कुनै पनि दलसँग नगर्ने ।
–टिकट वितरणका लागि सर्वस्वीकार्य संसदीय बोर्ड गठन गर्नुपर्ने ।
–निर्वाचन केन्द्रित हुनका लागि ५ सदस्यीय उच्चस्तरीय संयन्त्र गठन गर्नुपर्ने ।
–उम्मेदवारको टिकटमा देउवाले हस्ताक्षर गर्न नपाउने ।
–विशेष महाधिवेशनमा पेस भएका प्रतिवेदनहरूलाई पार्टीको पुँजीको रुपमा ग्रहण गर्नुपर्ने ।