काठमाडौं । नेपाली कांग्रेसका महामन्त्री गगनकुमार थापाले शेरबहादुर देउवाको नेतृत्वमा रहेको केन्द्रीय कार्यसमिति भंग भइसकेको घोषणा गर्दै विशेष महाधिवेशनले पार्टीलाई नयाँ दिशामा अघि बढाएको बताएका छन् । देउवा पक्षबाट आफूमाथि कारबाही गरिएको खबर सार्वजनिक भए लगत्तै विशेष महाधिवेशनलाई सम्बोधन गर्दै थापाले अब निर्वाचन समितिमार्फत नयाँ केन्द्रीय कार्यसमिति चयन हुने स्पष्ट पारे । भृकुटीमण्डपमा जारी विशेष महाधिवेशनलाई सम्बोधन गर्दै थापाले भने, ‘यहाँ नेपाली कांग्रेसको विशेष महाधिवेशन चलिरहेको छ । शेरबहादुर देउवाको नेतृत्वमा रहेको केन्द्रीय कार्यसमिति भंग भइसकेको छ । अब हामी नयाँ केन्द्रीय कार्यसमिति चयन गर्ने प्रक्रियामा छौं । यो कुरा सिंगो देशले सुनिरहेको छ ।’

उनले कांग्रेसको यही अभ्यास नै पार्टीको लोकतान्त्रिक चरित्र भएको उल्लेख गर्दै देशभरका कार्यकर्ता, शुभेच्छुक र नागरिकहरूले यो प्रक्रियालाई नियालिरहेको बताए । थापाले विशेष महाधिवेशनमा सहभागी नेता–कार्यकर्ता नै बीपी कोइराला र गणेशमान सिंहका सच्चा अनुयायी भएको दाबी गरे । ‘बीपी र गणेशमानका परिवारका सदस्यहरू यहाँ नहुन सक्छन्, तर हामी उनीहरूको विचार बोक्ने सन्तान हौं’, उनले भने, ‘जसले बीपी र गणेशमानका विचार बोकेका छन्, उनीहरू नै वास्तविक सन्तान हुन् ।’

निर्वाचन आयोगलाई मान्यता दिन आग्रह
विशेष महाधिवेशनको वैधानिकताबारे बोल्दै थापाले निर्वाचन आयोगले महाधिवेशनबाट गरिएका निर्णयलाई मान्यता दिनुपर्ने तर्क गरे । बहुमत महाधिवेशन प्रतिनिधिहरूको उपस्थितिमा निर्णय भएकाले आयोगले यसलाई स्वीकार गर्ने विश्वास व्यक्त गर्दै उनले भने, ‘हामीले अन्तिम समयसम्म मिलनको प्रयास ग¥यौं । निर्वाचन आयोग, कानुन र संस्थाप्रति मेरो विश्वास छ । विशेष महाधिवेशनबाट आएको निर्णयलाई आयोगले मान्यता दिनुपर्छ ।’ उनले देउवा पक्षले नै आफूहरूलाई वार्ताका लागि बोलाएको दाबी गर्दै पनि अन्तिमसम्म सहमति नजुटेको बताए । ‘कोही ‘आइज’ भनेर आएको थियो, तर ‘जा’ भनेर जान सकेन’, थापाको टिप्पणी थियो ।

‘गाली होइन, एकताको राजनीति’
थापाले कार्यकर्ता तथा समर्थकहरूलाई संयमित र जिम्मेवार अभिव्यक्ति दिन आग्रह गरे । विशेष महाधिवेशनपछि पनि पार्टीभित्र सबैलाई सँगै लैजानु पर्ने आवश्यकता औंल्याउँदै उनले कसैप्रति गालीगलौज नगर्न अनुरोध गरे । ‘गाउँठाउँमा जाँदा वा सामाजिक सञ्जालमा लेख्दा कसैको पनि गाली नगरिदिनु होला’, उनले भने, ‘हामी सबैलाई सँगै लिएर जानुछ ।’

आफ्नो सम्बोधनको अन्त्यतिर थापाले राजनीतिक सौहार्दको सन्देश दिँदै विशेष महाधिवेशनपछि पूर्व सभापति शेरबहादुर देउवाको आशीर्वाद लिन जानुपर्ने बताए । ‘केही दिनपछि कांग्रेसले नयाँ निर्णय सुनाउँछ । दुई दिनपछि त नेपाली कांग्रेसका पूर्व सभापति शेरबहादुर देउवाको आशीर्वाद लिन जानु छँदैछ’, उनले भने । विशेष महाधिवेशनमार्फत कांग्रेसभित्रको शक्ति संघर्ष अब नयाँ चरणमा प्रवेश गरेको संकेत गर्दै थापाको अभिव्यक्तिले पार्टीभित्रको आन्तरिक राजनीतिक बहसलाई थप तीव्र बनाएको छ ।