काठमाडौं । राष्ट्रिय स्वतन्त्र पार्टी (रास्वपा) को समानुपातिक उम्मेदवार बन्दसूचीबाट टासी ल्हाजोमको नाम हटाइएको विषयले राजनीतिक वृत्तमा विवाद चर्किएको छ । आदिवासी जनजाति महिला क्लस्टरतर्फ पहिलो नम्बरमा रहेकी ल्हाजोमको नाम हटाइएकोबारे निर्वाचन आयोग स्रोतले निवेदन परेको पुष्टि गरे पनि पार्टीले औपचारिक निर्णय सार्वजनिक गरेको छैन ।

स्वयं टासी ल्हाजोमले भने आफूले बन्दसूचीबाट नाम फिर्ता नलिएको स्पष्ट पारेकी छन् । सामाजिक सञ्जालमा लामो स्टाटस लेख्दै उनले पार्टी नेतृत्वले आफूसँग कुनै छलफल नगरी नाम हटाइएको दाबी गरेकी छन् । ‘मैले नाम फिर्ता लिएको छैन, न त फिर्ता लिने प्रक्रियामा सहभागी नै भएकी छु’, उनले लेखेकी छन् ।

ल्हाजोममाथि तिब्बतसम्बन्धी गतिविधिसँग जोडिएको, ‘फ्रि तिब्बत’ अभियानमा संलग्न भएको तथा तिब्बती प्रेमीसँग सम्बन्ध रहेको जस्ता आरोपहरू सार्वजनिक भएपछि पार्टीले नाम हटाएको दाबी रास्वपा स्रोतहरूले गरेका छन् । तर ती सबै आरोपको उनले कडा खण्डन गरेकी छन् । ‘म तिब्बती नागरिक होइन, फ्रि तिब्बतसम्बन्धी कुनै गतिविधिमा संलग्न छैन र मेरो प्रेमी पनि तिब्बती होइन’, उनले स्पष्ट पारेकी छन् । उच्च शिक्षा भारत र अमेरिकामा हासिल गरेकी तथा आफूलाई ‘जेनजी अभियन्ता’ भनेर चिनाउने ल्हाजोम यसअघि मन्त्री बन्ने चर्चामा रहे पनि अन्तिम समयमा उनको नाम काटिएको थियो । अहिले फेरि समानुपातिक सूचीबाट हटाइएपछि उनले यो निर्णयलाई राजनीतिक र व्यक्तिगत चरित्रहत्या प्रयासका रूपमा लिएको संकेत गरेकी छन् ।

उनले आफूविरुद्ध लगाइएका आरोपहरू यदि सत्य भए प्रमाण सार्वजनिक गर्न खुला चुनौती दिएकी छन् । ‘जो–कोहीसँग म वा मेरो गतिविधि तिब्बतसँग जोडिएको प्रमाण छ भने सार्वजनिक गरियोस्’, उनको भनाइ छ । साथै सार्वभौम देशको नागरिकको हैसियतमा आफूलाई संविधानले दिएको चुनाव लड्ने अधिकार कसैले खोस्न नसक्ने बताउँदै, अधिकार हनन भए कानुनी बाटो अपनाउने चेतावनी पनि दिएकी छन् । यस विषयमा रास्वपाका प्रवक्ता मनिष झाले भने टासीले पार्टी नेतृत्वसँग छलफल गरेरै नाम फिर्ता लिएको दाबी गरेका छन् । ‘उहाँले तत्काल सांसद नबन्ने, समुदायका लागि अन्य क्षेत्रबाट काम गर्ने बताउनु भएको हो’, उनको भनाइ छ ।

तर ल्हाजोमले उक्त दाबी अस्वीकार गर्दै आफूलाई नेतृत्वबाट कुनै जानकारी वा परामर्श नआएको बताइन् । उनले यसबारे उपसभापति डिपी अर्यालसँग सोध्न आग्रह गरेकी छन् । यसअघि राप्रपाका प्रवक्ता ज्ञानेन्द्र शाहीले ल्हाजोम तिब्बती शरणार्थी भएको दाबी गर्दै नागरिकतामाथि प्रश्न उठाएका थिए भने जेनजी कर्णालीकी अध्यक्ष सुप्रिया शाहीले उनलाई फ्रि तिब्बत अभियानसँग जोड्दै छानबिनको माग गरेकी थिइन् । निर्वाचन कानुनअनुसार उम्मेदवारले स्वयं लिखित रूपमा नाम फिर्ता नलिएसम्म बन्दसूचीबाट हटाउन नमिल्ने व्यवस्था छ । यही कानुनी प्रावधानलाई आधार मानेर टासी ल्हाजोमले आफ्नो नाम हटाइएको प्रक्रिया नै शंकास्पद भएको दाबी गर्दै सार्वजनिक बहस र कानुनी लडाइँको संकेत गरेकी छन् ।