Nepal One HD – Revealing the Truth – Latest Online News from Nepal
Breaking News from Political, Health, Sports, Lifestyle and Social News
काठमाडौं । नेत्रविक्रम चन्द ‘विप्लव’ आगामी फागुन २१ गतेको चुनावमा सहभागी हुने भएका छन् । प्रतिनिधिसभा निर्वाचन प्रयोजनका लागि ‘विप्लव’ नेतृत्वको नेकपा (माओवादी) पार्टी मंगलबार निर्वाचन आयोगमा दर्ता भएको छ।
विप्लवलाई आयोगले गुलाबको फूल चुनाव चिह्न दिएको छ। दल दर्ताको प्रमाणपत्र र चुनाव चिन्ह लिन विप्लव लगायत नेताहरु बाजागाजा सहित आज निर्वाचन आयोग पुगेका थिए।
काठमाडौं । नेपाल कम्युनिष्ट पार्टी (नेकपा) का महासचिव नेत्रविक्रम चन्द (विप्लव) ले देशलाई रुपान्तरण गर्ने भन्दै सात बुँदे आधार अघि सारेका छन् । आज (आइतबार) सामाजिक सञ्जालमार्फत चन्दले आफ्ना योजना अघि सारेका हुन् । उनी लेख्छन्, ‘बेमौसमी दलाल पुँजीवादी दुर्गन्धी हावाहुरीलाई घृणाकासाथ दुत्कार्दै, महान् कम्युनिस्ट आदर्शको ध्वजा फहराउँदै अगाडि बढौँ ।’
हेर्नुस् विप्लवका देश रुपान्तरणका सात आधार
१) हामीसँग असल कम्युनिस्ट पार्टी छ
२) नेपाली विशेषताको समाजवादी लक्ष्य स्पष्ट छ
३) आफ्नै आधारभूत नयाँ आर्थिक मार्ग छ
४) विज्ञान–प्रविधिमा आधारित दृष्टिकोण छ
५) देश र जनताको रक्षा र सेवा गर्ने अठोट छ
६) समाजलाई नयाँ बाटो देखाउने सी संस्कृति छ र
७) सन्तुलित अन्तर्राष्ट्रिय सम्बन्ध निर्माणको नीति छ ।
हालै निर्वाचन आयोगमा दल दर्ता गरी चुनावी कार्यक्रममा होमिएका विप्लवले जनार्दन शर्मा, घनश्याम भुसाललगायत नेताहरूसँग सहकार्यको घोषणा गरेका छन् ।
काठमाडौं । नेत्रविक्रम चन्द (विप्लव) नेतृत्वको नेकपा निर्वाचन आयोगमा सनाखतका लागि निर्वाचन आयोग पुगेको छ । नेकपा महासचिव विप्लव नेतृत्वमा आज नेकपा नेताहरू निर्वाचन आयोग पुगेर पार्टी सनाखत गरेका हुन् । प्रवक्ता खड्गबहादुर विश्वकर्मासहित निर्वाचन आयोगको केन्द्रीय कार्यालय कान्तिपथ पुगेका हुन् ।
आगामी निर्वाचनमा भाग लिने तयारीमा नेकपा छ । विप्लव नेकपाले यसअघि नै दल दर्ताको निवेदन दिएको थियो । दल दर्ताका लागि आवश्यक कागजातसहित सनाखतका लागि आयोगले बोलाएपछि उनीहरू आज सनाखत गर्न गएका हुन् । दल दर्तासँगै विप्लव नेतृत्वको नेकपा पनि अब चुनावमा जाने भएको छ । देश र जनताको चाहना र अहिलेको वस्तुस्थितिलाई बुझेर आफूहरू दल दर्ता प्रक्रियामा लागेको नेताहरूले बताएका छन् ।
तस्वीरहरु : नेपाल फोटो लाइब्रेरी
काठमाडौं । देशको बदलिँदो राजनीतिक परिदृश्यबीच बाम आन्दोलनका तीन शीर्ष नेताहरू नेकपा (माओवादी) का महासचिव नेत्रविक्रम चन्द ‘विप्लव’, माओवादी केन्द्र परित्याग गरेका पूर्व अर्थमन्त्री जनार्दन शर्मा र नेकपा (एकीकृत समाजवादी) का महासचिव घनश्याम भूसाल नयाँ सहकार्यका लागि तयार भएका छन् । आज (शुक्रबार) बिहान हरिसिद्धीस्थित विप्लव निवासमा भएको भेटवार्तापछि ती तीन नेताबीच मुलुकको राजनीतिक अन्योल समाधान र बाम शक्तिहरूबीच नयाँ सहकार्यको ढाँचा निर्माण गर्ने सहमति बनेको स्रोतले बताएको छ ।
भेटपछि सञ्चारकर्मीहरूसँग कुरा गर्दै घनश्याम भूसालले सहकार्यको सुरुवातलाई ‘नयाँ दिशातर्फको कदम’ भन्दै यसलाई एकीकरणको रूपमा नलिन आग्रह गरे । उनले भने, ‘हामी एकताबद्ध भएर जानेछौं, तर एकीकरण भन्ने भ्रम नपाल्न आग्रह गर्दछु । देशको वर्तमान राजनीतिक आवश्यकताअनुसार सहकार्यलाई विस्तार र घनिभूत बनाउँदै लैजाने छौं ।’ भूसालले विगतमा पनि तीन नेताबीच सहकार्यको अभ्यास भएको बताउँदै अहिले त्यसलाई पुनः सक्रिय र संगठित रूपमा अघि बढाउने तयारी भइरहेको जानकारी दिए ।
भेटमा देशको पछिल्लो राजनीतिक अस्थिरता, कम्युनिष्ट आन्दोलनको दिशाहीनता र वाम शक्तिहरूबीचको दूरी घटाउने उपायबारे विस्तृत छलफल भएको बताइएको छ । बैठकमा सहकार्यको औपचारिक रूपरेखा र राजनीतिक प्रतिवद्धताबारे मस्यौदा तयार पार्ने सहमति भएको र त्यसको विवरणसहितको संयुक्त विज्ञप्ति आजै सार्वजनिक गरिने जनाइएको छ । यसैबीच नेकपा (माओवादी केन्द्र) र नेकपा (एकीकृत समाजवादी) बीचको एकता प्रक्रियापछि दुवै नेता आफ्ना–आफ्ना स्वतन्त्र अभियानमा लागेका छन् ।
जनार्दन शर्माले ‘प्रगतिशील अभियान नेपाल’ को नाममा युवालाई एकीकृत गर्दै नयाँ राजनीतिक अभियान थालेका छन् । भूसालले भने एकीकृत समाजवादीभित्र एकता प्रक्रियाबाट अलग भएका कार्यकर्तालाई एकजुट गर्दै नयाँ आन्दोलनको तयारी गरिरहेका छन् । उता, विप्लव नेतृत्वको नेकपाले शुक्रबार काठमाडौंको भृकुटीमण्डपमा अन्तरिम सरकार गठनलगायतका मागसहित र्याली र जनसभा गरेको छ । सभामा विप्लवले सच्चा कम्युनिष्ट शक्तिहरूबीच एकता अपरिहार्य भएको भन्दै नयाँ राजनीतिक ध्रुवीकरणको संकेत दिएका थिए । यी घटनाक्रमले बाम राजनीतिमा नयाँ समीकरण बन्ने संकेत गरेको विश्लेषकहरूको ठम्याइ छ । तीन नेताको आजै आउने भनिएको संयुक्त विज्ञप्तिले यस सहकार्यको स्वरूप र भविष्यको दिशाबारे थप स्पष्टता ल्याउने अपेक्षा गरिएको छ ।
काठमाडौं । नेकपाका महासचिव नेत्रविक्रम चन्द ‘विप्लव’ ले निरंकुश बन्दै गएको सत्तालाई जेनजीको बलिदानले खरानी बनाई दिएको बताएका छन् । सर्वपक्षीय अन्तरिम सरकारको माग गर्दै नेकपाले काठमाडौंमा निकालेको प्रदर्शनलाई सम्बोधन गर्दै विप्लवले जेनजी पुस्ताले आफ्नो रगत दिएर निरंकुश सत्तालाई खरानी बनाएको बताएका छन् ।
‘जेनजी आन्दोलनमा बलिदान गर्नेहरूले नेपाललाई कहिल्यै नबिर्सने गुण लगाएर गएका छन् । राज्यसत्ता अन्धो थियो । बहिरो थियो । निरंकुश थियो । मुर्ख बन्दै गएको थियो । जनताविरुद्ध तानाशाही बन्दै गएको थियो,’ उनले भने, ‘जेनजीले आफ्नो रगत दिएर, बलिदान गरेर अहंकारी दलालहरूको सत्ता र संसद्लाई थला पारेर आगोमा खरानी बनाइदिए ।’
उनले काठमाडौंको सडकबाट नवयुवाको रगत अझै आलै रहेको र जलाइएका संरचनाहरू जीर्ण बनेर उभिएको जिकिर समेत गरेका छन् । कम्युनिष्ट चन्दले विदेशी प्रभाव समाप्त नभएसम्म देशमा निष्पक्ष शासन सम्भव नहुने बताएका छन् । विप्लवले प्रत्यक्ष जनताबाट निर्वाचित कार्यकारी प्रमुखको व्यवस्था गर्नुपर्नेमा जोड दिए । उनले भने, ‘प्रधानमन्त्री होस् वा राष्ट्रपति, फरक पर्दैन, तर जनताले नै प्रत्यक्ष चुन्ने कार्यकारी प्रमुखतर्फ देश जानुपर्छ ।’
तर, उनले हालको परिस्थितिमा त्यो सम्भव नदेखिएको बताए । विप्लवले भने, ‘तर, आजको दिनमा सम्भव छैन । आजको दिनमा प्रत्यक्ष कार्यकारी भनियो भने फेरि यहाँ पैसाका बलमा एनजीओहरू, विदेशी डलरमा नेपाली जनतालाई भ्रष्टीकरण गरेर, ठगेर हाम्रो देशका विरुद्धमा उत्तेजना फैलाउने एनजीओहरुलाई पनि प्रतिबन्ध लगाउनु पर्ने छ । लखेट्नुपर्ने छ ।’ उनका अनुसार विदेशी प्रभाव, भ्रष्टाचार र एनजीओको नियन्त्रण अन्त्य भएपछि मात्र नेपालमा निष्पक्ष चुनाव र जनमुखी शासन सम्भव हुनेछ ।
काठमाडौं । नेत्रविक्रम चन्द ‘विप्लव’ नेतृत्वको नेपाल कम्युनिष्ट पार्टीले काठमाडौंमा बिहीबार प्रदर्शन गरेको छ । सर्वपक्षीय अन्तरिम सरकारको माग गर्दै नेकपाले र्यालीसहित शान्ति बाटिकाबाट भृकुटीमण्डपसम्म प्रदर्शन गरेको हो । भृकुटीमण्डप पुगेर प्रदर्शन सभामा परिणत भएको छ । सभालाई महासचिव नेत्रविक्रम चन्द विप्लवले सम्बोधन गर्नेछन् । गत भदौमा भएको जेनजी आन्दोलनपछि विकसित राजनीतिक घटनाक्रम लगायतका विषयमा पार्टीको धारणा सार्वजनिक गर्ने उद्देश्यका साथ आयोजना गरिएको नेकपाले बताएको छ ।
तस्वीरहरु : नेपाल फोटो लाइब्रेरी
काठमाडौं । नेत्रविक्रम चन्द ‘विप्लव’ नेतृत्वको नेपाल कम्युनिष्ट पार्टी (नेकपा) ले आज (बिहीबार) बृहत् जनप्रदर्शन र जनसभा गर्दैछ । प्रवक्ता खड्गबहादुर विश्वकर्मा ‘प्रकाण्ड’ ले दिएको जानकारीअनुसार आज दिउँसो १२ बजे शान्तिबाटिकाबाट बृहत् र्याली सुरु हुनेछ भने दिउँसो १ बजे भृकुटीमण्डपमा आमसभा गरिनेछ । सभामा महासचिव विप्लवलगायतका शीर्ष नेताहरूले बोल्ने कार्यक्रम तय गरिएको छ।
नेकपाले अहिलेको सरकार विघटनको माग राखेको छ । ‘राष्ट्रिय स्वाधीनता, समाजवाद र सर्वपक्षीय अन्तरिम सरकार गठन हुनुपर्छ,’ प्रवक्ता प्रकाण्डले भने, ‘आम जनताको समस्या सम्बोधन गर्न तथा संविधान पुनर्लेखनलगायतका विषयमा हालको सरकारले काम गर्न सक्दैन।’ पार्टीले जेनजी आन्दोलनपछिको विकसित राजनीतिक घटनाक्रमबारे आफ्नो धारणा सार्वजनिक गर्ने तयारी गरेको छ । सभालाई महासचिव नेत्रविक्रम चन्द विप्लवले सम्बोधन गर्नेछन् । सभा अगाडि र्याली निकाल्ने योजना नेकपाको छ । सभामा काठमाडौं उपत्यका र आसपासका जिल्लाबाट कार्यकर्ताहरुलाई उतार्ने तयारी छ । १० हजार बढीको संख्यामा कार्यकर्ता उतार्ने दाबी उनीहरुको छ ।
काठमाडौं । प्रस्तावित कम्युनिष्ट पार्टी नेपालका महासचिव विप्लवले नयाँ कम्युनिष्ट केन्द्र निर्माण अपरिहार्य भएको बताएका छन् । कम्युनिष्ट आन्दोलनबारे सामाजिक सञ्जाल फेसबुकमा धारण प्रस्तुत गर्दै उनले यस्तो बताएका हुन्।
विप्लवले चार बुँदामा आफ्नो धारणा राखेका छन् । कम्युनिष्टहरूका बीचमा मोर्चाबन्दी जरुरी रहेको, कम्युनिष्टहरूबीच वैचारिक, सैद्धान्तिक, व्यवहारिक बहसहरू आवश्यक छन रहेको उनको भनाइ छ । उनले एकताका नाममा पार्टीहरू खप्टिने र उप्किने तरिका निकै थोत्रो भइसकेको बताउँदै यसमा रमाउन नसकिने पनि बताएका छन् । उनले यो व्यङ्ग्य मात्रै भएको टिप्पणी गरेका छन् ।
आफ्नो पार्टीबाट फुटेर चिरन सीलगायतले माओवादी केन्द्रसँग एकता गर्न लागे पछि उनले यस्तो टिप्पणी गरेका हुन् । माओवादी र एकीकृत समाजवादीसहितका दलहरुले यसै साता एकता गर्ने तयारी गरेका छन् । आउँदो फागुन २१ गतेको निर्वाचनमा होमिने तयारी गरिरहेका बेला हिजो (शुक्रबार) मात्र नेत्रविक्रम चन्द ‘विप्लव’ नेतृत्वको नेपाल कम्युनिष्ट पार्टी (नेकपा) फेरि फुटेको हो । पार्टीका पोलिटव्यूरो सदस्य चिरन सीको नेतृत्वमा ७५ सदस्यीय केन्द्रीय समिति गठन गरिएको छ । उक्त पार्टीको प्रवक्ताको जिम्मेवारी जितेन्द्र सीलाई दिइएको छ ।
भेलाले गरेका निर्णयबारे आज पत्रकार सम्मेलनमार्फत जानकारी गराइने महासचिव सीले बताएका छन् । राष्ट्रिय भेलाले छिट्टै एकतामा आउन नेकपाका महासचिव विप्लवसहितका अन्य विभिन्न समाजवादी मोर्चामा रहेका दललाई आह्वान गर्ने निर्णय गरेको महासचिव सीले बताएका छन्। साविकको १४५ सदस्यीय केन्द्रीय समिति सदस्यमा ७५ जना आफूतिर आएको उनले दाबी गरेका छन् ।
काठमाडौं । नेकपाका महासचिव नेत्रविक्रम चन्द ‘विप्लव’ दल दर्ताका लागि निर्वाचन आयोगमा जाने भएका छन् । दल दर्ताका लागि महासचिव ‘विप्लव’ को नेतृत्वमा पौने १ बजे आयोगको कार्यालयमा जान लागेको उक्त पार्टी एक स्थायी समिति सदस्यले जानकारी दिएका छन् ।
नेकपाले केही समयअघि नै स्थायी समिति कर्णजित बुढाथोकीको संयोजकत्वमा केन्द्रीय सदस्य एवं काठमाडौं सेक्रेटरी चिरञ्जीवि ढकाल र वरिष्ठ अधिवक्ता कपिलचन्द्र पोखरेल रहने गरी ३ सदस्यीय पार्टी दर्ता गर्न समिति बनाएको थियो । नेकपा नाममा यसअघि नै निर्वाचन आयोगमा दल दर्ता भइसकेकाले पार्टीको नाम समेत परिवर्तन गर्ने गरी पार्टी दर्ताको तयारी छ ।
काठमाडौँ । नेपाल कम्युनिष्ट पार्टीका महासचिव नेत्रविक्रम चन्द ‘विप्लव’ ले यही कात्तिक २० गते काठमाडौँमा प्रदर्शन र सभा गर्ने भएको छ । आज बिहान सामाजिक सञ्जाल फेसबुकमा एक स्ट्याटस लेख्दै विप्लवले यस्तो आह्वान गरेका हुन् । उनले लेखेका छन् ‘नेपाललाई अरूले होइन हामी आफैले फेर्ने हो । अरूले होइन नेपालीले नै चलाउने हो । जब भ्रष्ट, कमिसनखोर, तस्कर,दलाल, परजीवीहरू समाप्त हुनेछन् देशले आत्मसम्मानसहित उन्नति हासिल गर्नेछ । स्वाधीनता र समाजवादका पक्षमा उभिन कात्तिक २०गते काठमाडौँमा भेटौँ साथीहरू ।’
उनले स्वाधीनता र समाजवादका पक्षमा उभिनका लागि कात्तिक २० गते काठमाडौँमा भेट्न भनेका छन् । नेता सन्तोष बुढामगरले भने जेनजी आन्दोलनपछि विकसित राजनीतिक घटनाक्रम लगायतका विषयमा पार्टीको धारणा आम जनतामाझ पुर्याउने उद्देश्यले सभा गर्न लागिएको जानकारी दिए ।
नेता बुढामगरका अनुसार उक्त दिनमा काठमाडौँ उपत्यका र आसपासका जिल्लाका कार्यकर्ताहरूद्वारा र्याली निकालिने छ । त्यसपछि सभा आयोजना हुनेछ । सभालाई महासचिव नेत्रविक्रम चन्द विप्लवले सम्बोधन गर्ने छन् । सभामा करिब १०÷१५ हजार मानिसहरू सहभागी हुने उनले बताए । प्रदर्शन र सभास्थल भने निश्चित भई नसकेको उनले बताए ।
काठमाडौं । नेपाल कम्युनिष्ट पार्टीका महासचिव नेत्रविक्रम चन्द ‘विप्लव’ ले स्वाधीनता र समाजवाद पक्षधरलाई कात्तिक २० गते काठमाडौँ बोलाएका छन् । नेपाललाई अरूले होइन, हामी आफैले फेर्ने हो भन्दै उनले यस विषयमा छलफल गर्न समाजवादीहरूलाई कात्तिक २० गते काठमाडौंमा भेट्न अपिल गरेका हुन् ।
आज (सोमबार) सामाजिक सञ्जालमार्फत समाजवादीहरूलाई भेटघाटका लागि आह्वान गरेका उनले यस विषयमा विस्तृत जानकारी भने दिएका छैनन् । उनले लेखेका छन्, ‘नेपाललाई अरूले होइन, हामी आफैले फेर्ने हो । अरूले होइन, नेपालीले नै चलाउने हो । जब भ्रष्ट, कमिसनखोर, तस्कर, दलाल, परजीवीहरू समाप्त हुनेछन्, देशले आत्मसम्मानसहित उन्नति हासिल गर्नेछ । स्वाधीनता र समाजवादका पक्षमा उभिन कात्तिक २० गते काठमाडौँमा भेटौँ साथीहरू ।’
काठमाडौं । नेकपाका महासचिव नेत्रविक्रम चन्द ‘विप्लव’ ले नेपालमा वैदेशिक हस्तक्षेपको सम्भावित स्वरूपप्रति गम्भीर आशंका व्यक्त गरेका छन् । उनले ‘जेनजी आन्दोलन’ सँग सम्बन्धित टीओबी (TOB) समूहको क्रियाकलापप्रति चिन्ता प्रकट गर्दै, नेपालमा ‘संयुक्त अमेरिकी–नेपाली–तिब्बतीयन सेना’ बनाउने योजनाको संकेत देखिएको दाबी गरेका छन् । आइतबार राजधानीमा आयोजित पत्रकार सम्मेलनमा बोल्दै उनले भने, ‘अहिले टीओबी भन्ने समूह देखिएको छ । हतियार देखाएको छ । अमेरिकाको प्रत्यक्ष हस्तक्षेप भएको देखिन्छ । कतै अमेरिकी–नेपाली–तिब्बतीयन सेना बनेको त होइन ?’
विप्लवले हालको सरकार र संविधानमा गहिरो असन्तुष्टि प्रकट गर्दै सर्वपक्षीय अन्तरिम सरकार गठनको माग राखेका छन् । उनका अनुसार, यस्तो सरकारमा जनआन्दोलनमा संलग्न सबै पक्ष, उत्पीडित वर्ग, किसान, मजदुर, दलित, महिला, मधेशी, जनजाति, बुद्धिजीवी, व्यवसायी र वैज्ञानिकसम्मको प्रतिनिधित्व सुनिश्चित हुनुपर्छ ।
संविधान सुधार र सत्ता संरचनामा आमूल परिवर्तनको माग
महासचिव चन्दले संविधान पुनर्लेखनको खाँचो औंल्याउँदै उच्चस्तरीय संविधान सुधार आयोग गठनको प्रस्ताव राखेका छन् । उनले वर्तमान शासन संरचना परिवर्तन गरी पूर्ण समानुपातिक प्रणालीसहितको प्रत्यक्ष निर्वाचित कार्यकारी प्रणाली निर्माण गर्नुपर्ने माग समेत गरे । ‘शासकीय स्वरूप नै बदल्नुपर्ने बेला आएको छ’, उनले भने, ‘संविधान संशोधन बिना अगाडि बढ्न सकिन्न, त्यसपछि मात्र निर्वाचनमा जान सकिन्छ ।’
भ्रष्टाचार, कालोधन र नोटबन्दीको माग
विप्लवले देशमा व्यापक कालोधन थुप्रिएको दाबी गर्दै ५ सय र हजार रुपैयाँका नोट तत्काल खारेज गर्नुपर्ने बताएका छन् । ‘पैसा जनतासँग छैन । पूँजी निष्क्रिय बनेको छ’, भन्दै उनले कालोधनको स्रोत पत्ता लगाउन छानबिन आयोग गठनको माग गरे । उनका अनुसार विदेशी बैंकमा लुकाइएको नेपाली सम्पत्तिमाथि समेत छानबिन हुनुपर्छ ।
नेकपाको उद्योग र उत्पादनमूलक कार्यदिशा
नेकपाले पार्टीको उत्पादनमूलक कार्यदिशालाई निरन्तरता दिँदै ‘एकीकृत स्वामित्व’ अन्तर्गत कृषि र उद्योग सञ्चालन गर्ने निर्णय गरेको छ । विप्लवका अनुसार, यस वर्ष वर्षे बालीको उत्पादन अपेक्षाकृत राम्रो भएको छ र पार्टीले उत्पादनलाई राजनीतिक कार्यक्रमसँग जोड्दै जानेछ ।
एकीकृत कम्युनिष्ट पार्टीको आवश्यकता
पत्रकार सम्मेलनको अन्त्यतिर विप्लवले वाम आन्दोलनलाई मजबुत बनाउन सबै कम्युनिष्ट शक्तिहरू एकीकृत हुनुपर्ने बताए । ‘अब एउटै कम्युनिष्ट पार्टी निर्माण गर्न आवश्यक छ’, उनले जोड दिए ।
काठमाडौं । नेत्रविक्रम चन्द ‘विप्लव’ नेतृत्वको नेकपाले सुशीला कार्की नेतृत्वको अन्तरिम सरकार खारेज गरी सर्वपक्षीय सरकार गठनको माग गरेको छ । नेकपाले आज (आइतबार) पत्रकार सम्मेलन गर्दै यस्तो धारणा सार्वजनिक गरेको हो । अहिलेको सरकारले सबैलाई र जेनजी आन्दोलनकै भावनालाई समेत समेट्न नसकेको उल्लेख छ ।
नेकपाले चुनावमा भाग लिने तर त्यसका लागि सुरक्षाको वातावरण नरहेको जनाएको छ ।‘नेकपा चुनावमा भाग लिन चाहन्छ । तर सुरक्षा छैन । राजनीतिक तहमा उच्चस्तरीय संयत्न बनाउनु पर्छ’ नेकपाले भनेको छ, ’जबरजस्ती चुनावको कुरा गरिन्छ भने त्यो कठपुतली नचाउने थलो बन्छ ।’
काठमाडौं । नेत्रविक्रम चन्द ‘विप्लव’ नेतृत्वको नेकपाको केन्द्रीय समिति बैठक जारी छ । कपिलवस्तुको शिवगढीमा जारी बैठकमा नेताहरुले बोल्ने क्रम चलिरहेको छ । बैठकमा महासचिव विप्लवले ‘विशिष्ट परिस्थितिको विशेष कार्यभार’ शीर्षकको प्रस्ताव पेस गरेका थिए । त्यसपछि केन्द्रीय सदस्यहरूले अध्ययन गरेर धारणा राखिरहेका छन्।
७७ वटै जिल्लाका जिल्ला इञ्चार्जहरूले पनि धारणा राखिरहेका छन् । नेताहरूका अनुसार माओवादी केन्द्रसँगको एकता कि निर्वाचन आयोगमा दल दर्ता गर्ने भन्ने ‘बिलखबन्द’ मा नेकपाका महासचिव विप्लव रहेका छन् । माओवादी घटकसहित विचार मिल्ने वाम घटकसँग एकता गर्ने गरी एक वर्षअघि नै निर्णय गरेको थियो । एक वर्ष अगाडिको निर्णय कार्यान्वयन हुन नसकेको भनेर कतिपयले निर्वाचन आयोगमा दल दर्ताको प्रक्रिया अगाडि बढाउन आवश्यक रहेको बताएका छन् ।
कतिपयले बदलिएको अवस्थामा वाम एकता गरेर जानु उपयुक्त हुने सुझाएका छन् । बैठकमा नेताहरुले माओवादीसहित विभिन्न पार्टीसँग एकतादेखि निर्वाचन आयोगमा पार्टी दर्ता गरेर जानुपर्नेसम्मको सुझाव आएका छन् । माओवादीसँग एकता गर्ने भनिएपछि लामो समयदेखि सहमति जुट्न सकेको छैन । महासचिव विप्लवकै नेतृत्वमा कम्युनिस्ट केन्द्र निर्माण गरेर जानु पर्नेसम्मको विषय उठेपनि केन्द्रीय समिति बैठकले ठोस निर्णय लिने तयारी छ । बैठकमा पार्टीको आन्तरिक संगठनात्मक सुदृढीकरण, जनआन्दोलनको तयारी र राष्ट्रिय राजनीतिमा कम्युनिस्ट शक्तिको भूमिकालगायतको विषयमा छलफल भइरहेको जनाइएको छ । केन्द्रीय समिति बैठकअघि विप्लवले स्थायी समिति बैठक बैठक राखेका थिए ।
काठमाडौं । नेत्रविक्रम चन्द ‘विप्लव’ नेतृत्वको नेकपाले विचार मिल्ने शक्तिहरूसँग एकता गर्नका लागि वार्ता टोली बनाएको छ । हालै बसेको बैठकले नयाँ कम्युनिष्ट केन्द्र निर्माणका लागि भन्दै प्रवक्ता खड्गबहादुर विश्वकर्माको नेतृत्वमा सबै कम्युनिष्ट समूह र पार्टीहरूसँग छलफल गर्ने उद्देश्यले वार्ता समिति गठन गरेको हो ।
वार्ता समितिमा समितिमा स्थायी समिति सदस्य अनिल सी, शिलु सी, सुशील सी, पोलिटब्युरो सदस्य चिरण र केन्द्रीय सदस्य जितेन्द्र सी छन् । बैठकले माओवादी घटक र चौथो महाधिवेशन समूहसँग प्राथमिकताका साथ वार्ता गर्ने निर्णय गरेको छ । माओवादी केन्द्रले यसअघि नै विप्लव नेतृत्वको नेकपासँग एकता गर्ने निर्णय गरिसकेको छ ।
नेकपाको बैठक बस्नुअघि माओवादीका अध्यक्ष प्रचण्डले पार्टी एकताबारे गरेको निर्णय विप्लवको घरैमा पुगेर जानकारी गराएका थिए । नेकपा समाजवादी मोर्चामा पनि आबद्ध छ । मोर्चामा माओवादीसहित नेकपा एकीकृत समाजवादी र महेन्द्र राय यादव नेतृत्वको नेसपा सहभागी छ । मोर्चालाई पार्टी एकतासम्म लैजानेगरी छलफल समेत अघि बढाइएको छ ।
