काठमाडौं । नेपाली कांग्रेसका कार्यवाहक सभापति पूर्णबहादुर खड्काले पार्टी विधान विपरीत विशेष महाधिवेशनको नाममा भेला आयोजना गरिएको भन्दै त्यसप्रति गम्भीर आपत्ति जनाएका छन् । पार्टीको संस्थापन पक्षको तर्फबाट आयोजित पत्रकार सम्मेलनमा बोल्दै खड्काले विधानले तोकेको प्रक्रिया बाहिर गएर गरिएका गतिविधि अस्वीकार्य हुने स्पष्ट पारे ।

खड्काका अनुसार पार्टी विधानले कुनै पनि प्रकारको अधिवेशन वा महाधिवेशन आयोजना गर्ने सम्पूर्ण अधिकार केन्द्रीय कार्यसमितिलाई मात्र दिएको छ । केन्द्रीय समितिबाहेक अन्य कुनै पदाधिकारी, समूह वा व्यक्तिलाई विशेष महाधिवेशन आह्वान गर्ने अधिकार विधानले नदिएको उनको दाबी छ । उनले विशेष महाधिवेशनको वैधानिकताबारे निर्वाचन आयोगको गम्भीर ध्यानाकर्षण गराइसकिएको जानकारी दिँदै पार्टी विभाजनपछि उत्पन्न परिस्थितिमा विधानको रक्षा गर्नु अनिवार्य भएको बताए । ‘विधानअनुसार नियमित महाधिवेशनको प्रक्रिया अघि बढिसकेको अवस्थामा जानकारी बिनै स्थगन गरेर विशेष महाधिवेशन आह्वान गर्नु स्पष्ट रूपमा विधान विपरीत हो’, खड्काले भने ।

४० प्रतिशत प्रतिनिधिको हस्ताक्षर भए पनि निर्णय केन्द्रको अधिकार
खड्काले पार्टी विधानमा ४० प्रतिशत महाधिवेशन प्रतिनिधिले हस्ताक्षर गरी विशेष महाधिवेशनको माग गर्न सकिने व्यवस्था भए पनि त्यसको अन्तिम निर्णय केन्द्रीय कार्यसमितिकै अधिकार क्षेत्रभित्र पर्ने स्पष्ट पारे । विधानमा प्रयोग भएको ‘केन्द्र’ शब्दले केन्द्रीय कार्यसमिति र केन्द्रीय कार्यालयलाई जनाउने उनको व्याख्या थियो । ‘४० प्रतिशत प्रतिनिधिको माग आए पनि विशेष महाधिवेशन गर्ने वा नगर्ने निर्णय केन्द्रीय कार्यसमितिले मात्रै गर्न सक्छ’, उनले भने, ‘यसलाई व्यक्तिहरूले स्वेच्छाचारी रूपमा प्रयोग गर्न मिल्दैन।’

नियमित महाधिवेशन वैशाखमा, ढिलाइको दोष तत्कालीन महामन्त्रीद्वयलाई
खड्काले पार्टीले नियमित महाधिवेशन गर्ने निर्णय गत मंसिरमै गरिसकेको स्मरण गराउँदै त्यसमा ढिलाइ हुनुको मुख्य कारण तत्कालीन महामन्त्रीद्वय गगनकुमार थापा र विश्वप्रकाश शर्माले क्रियाशील सदस्यताको विवरण समयमै टुंग्याउन नसक्नु भएको जिकिर गरे। सोही कारण अघिल्लो महाधिवेशन कार्यतालिका प्रभावित भएको उनले बताए । उनका अनुसार नियमित महाधिवेशन अब आगामी वैशाखमा गर्ने गरी सर्वसम्मत कार्यतालिका बनाइएको छ । साथै, पुस १५ गते बसेको केन्द्रीय कार्यसम्पादन समितिको बैठकले विशेष महाधिवेशनको औचित्य नै समाप्त गरिसकेको उनको दाबी छ ।

विधानको रक्षा नै पार्टी एकताको आधार

पत्रकार सम्मेलनमा खड्काले पार्टीभित्र देखिएका विवाद समाधानको एकमात्र आधार विधान र संस्थागत निर्णय प्रक्रिया भएको उल्लेख गरे । ‘नेपाली कांग्रेसलाई जोगाउने हो भने विधानको अक्षरशः पालना गर्नुपर्छ’, उनले भने, ‘विधानभन्दा माथि कोही छैन ।’ उनले अन्त्यमा पार्टीभित्र अनुशासन, विधि र प्रक्रिया कायम राख्दै नियमित महाधिवेशनमार्फत नेतृत्व चयन गरिने प्रतिबद्धता दोहोर्‍याए ।