काठमाडौँ । नेपाली कांग्रेसका वरिष्ठ नेता तथा कार्यवाहक सभापति पूर्णबहादुर खड्काले पार्टी कार्यकर्तालाई निर्वाचन आयोगको सम्भावित गलत निर्णयको सामना गर्न तयार रहन निर्देशन दिएका छन् । खड्काले आयोगले पार्टीको विधान र संविधान विपरित निर्णय गरे आन्दोलन र प्रतिकारको विकल्प खुला रहने स्पष्ट पारेका छन् ।

शुक्रबार बिहान निर्वाचन आयोग पुगेर फर्किएपछि सानेपस्थित पार्टी कार्यालयमा बोल्दै खड्काले भने, ‘पार्टीको विधान विपरित काम गरे आयोगले लोकतन्त्रको कालो बादललाई साथ दिनेछ भने अन्यथा निर्णय गर्यो भने नेपाली कांग्रेस देशभर आन्दोलित हुनेछ ।’ उनले यसो भनेपछि कार्यकर्तामा सक्रिय प्रतिक्रिया र प्रतिकारका लागि तयारीको संकेत दिएका हुन् । खड्काले विशेष महाधिवेशनको वैधतामा प्रश्न उठाउँदै यसलाई पार्टीको एकतालाई कमजोर पार्ने कदमको रूपमा व्याख्या गरे ।

उनले भने, ‘विशेष महाधिवेशन गर्नु भनेको पार्टी विखण्डनको प्रयास हो । पार्टी संकटमा छ, त्यस्तो भेला आयोजना गर्नु उचित छैन । धेरै कुरा भ्रमपूर्ण रूपमा प्रस्तुत गरिएको छ । सभापतिले हामी उठाएका सबै कुरा सम्बोधन गर्ने प्रतिबद्धता जनाएका थिए, तर अहिले भ्रामक सूचना फैलाइएको छ ।’ उनी विशेष महाधिवेशनको पक्षधरहरूले झुठो प्रचार गरिरहेका दाबी गर्दै पार्टीको विधानको केन्द्र केन्द्रीय समिति नै भएको बताए ।

उनले यसलाई पार्टीलाई क्षति पुर्‍याउने उद्देश्यको भेला भएको बताए । खड्काले पार्टी कार्यकर्तालाई प्रतिकारका लागि पनि तयारी गर्न निर्देशन दिँदै भने, ‘कुनै षड्यन्त्र वा हाम्रोविरुद्ध हुने गलत निर्णय भए विरोधमा जान तयार रहनुहोला । हामी आफ्नो अधिकार र पार्टीको एकतालाई जोगाउन पछि हट्ने छैनौं ।’ उनले आयोगले चुनाव चिह्न र नाम गगन समूहलाई दिनु परेमा त्यसविरुद्ध आन्दोलनमा जाने चेतावनी पनि दिएका छन् । यो कदम नेपाली कांग्रेसभित्रको हालको सत्ता संघर्ष र निर्वाचन आयोगसँगको आधिकारिकता विवादको पृष्ठभूमिमा आएको हो । खड्काको चेतावनीले पार्टीभित्रको विभाजन र विवाद अझ उग्र हुनसक्ने संकेत गरेको विश्लेषकहरूले बताएका छन् ।