किएभ। मोल्डोभा, रोमानिया र युक्रेनबीचको युक्रेनी विद्युत नेटवर्कमा शनिबार ‘प्राविधिक खराबी’ को कारण सेवा अवरूद्ध भएको युक्रेनका ऊर्जा मन्त्री डेनिस स्मिगलले जानकारी गराउनु भएको छ।

विद्युत लाइनमा देखिएको प्राविधिक समस्याका कारण राजधानी किएभमा पानीको आपूर्ति नै बन्द हुन पुगेको छ भने शहरको मेट्रो नेटवर्क पूर्ण रूपमा बन्द भएको र हजारौँ यात्रीहरू अलपत्र परेका छन् ।

“शनिबार बिहान १०ः४२ बजे देखि सुरू भएको प्राविधिक खराबीका कारण रोमानिया र मोल्डोभाको विद्युतीय नेटवर्क र पश्चिमी र मध्य युक्रेनको बीचको ७५० किलोभोल्ट लाइनको बीचमा ४०० किलोभोल्ट लाइन एकैपटक अवरूद्ध भएको थियो,” मन्त्री स्मिगलले टेलिग्राममा उल्लेख गर्नुभएको छ।

उहाँले भन्नुभयो, “अबको केही घण्टाभित्रै विद्युत् सुचारु हुनेछ ।” राष्ट्रपति भोलोदिमिर जेलेन्स्कीले घटनालाई ‘आपतकाल’ भन्नुभएको छ र पुनस्र्थापनाको काम भइरहेको बताउनुभएको छ।

उनले टेलिग्राममा जारी सन्देशमा लेख्नुभएको छ, “यो काम भनेको चाँडै स्थितिलाई स्थिर बनाउनु हो।” यसले तीव्र रूसी बमबारीका कारण पहिले नै कमजोर अवस्थामा रहेको युक्रेनको ऊर्जा सञ्जालमा थप दबाब दिएको छ।

रूसले आफ्नो लगभग चार वर्षको आक्रमणको अवधिमा युक्रेनी ऊर्जा पूर्वाधारलाई लक्षित गरेको छ तर किएभले यो बर्षको शिशिर याम अहिलेसम्मकै सबैभन्दा कठिन भएको छ । रूसी आक्रमणले बिजुली कटौती हुँदा पछिल्ला चार बर्षमा खासगरी चिसो याममा शून्यभन्दा कम तापक्रममा लाखौँ व्यक्ति चिसाले कठ्याङ्ग्रिनु परेको छ।

बिजुली कटौतीका कारण शनिबार किएभको मेट्रो प्रणालीले पूर्ण रूपमा सेवा स्थगित गरेको छ। गत वर्ष प्रकाशित तथ्याङ्क अनुसार लगभग आठ लाख यात्रुहरूले दैनिक मेट्रो यातायात सेवा प्रयोग गर्छन्।

किएभका मेयर भिटाली क्लिट्स्कोले टेलिग्राममा गरेको एक पोस्टमा भन्नुभएको छ, “विद्युत सेवा पुनः सञ्चालनमा आएसँगै मेट्रो प्रणाली सञ्चालन हुनेछ।”