साओ पाउलो। सन् २०२५ मा ब्राजिलको औद्योगिक उत्पादन मात्र ०.६ प्रतिशतले वृद्धि भएको छ । यो जानकारी साओ पाउलो राज्यको उद्योग महासङ्घले मङ्गलबार सार्वजनिक गरेको प्रतिवेदनमा उल्लेख गरिएको छ ।

दक्षिण अमेरिकाको सबैभन्दा ठुलो उद्योग सङ्गठनका अनुसार अमेरिकी भन्सार कर र वार्षिक १५ प्रतिशतको उच्च आधार ब्याजदरका कारण ब्राजिलको उद्योग क्षेत्र निरन्तर दबाबमा परेको छ । महासङ्घले सरकारद्वारा लागु गरिएको कडा मौद्रिक नीति र बाह्य व्यापारिक दबाबले उद्योग क्षेत्रमा दोहोरो असर पारेको चेतावनी दिएको छ ।

यी कारणले उत्पादन सीमित हुनुका साथै निर्यात गतिविधि समेत कमजोर बनेको जनाइएको छ । मङ्गलबार सार्वजनिक तथ्याङ्क अनुसार सन् २०२५ को दोस्रो छ महिनाको अवधिमा संयुक्त राज्य अमेरिकातर्फको निर्यात ८.६ प्रतिशतले घटेको छ ।

यस्ता चुनौती समाधान गर्न उद्योग महासङ्घले श्रमिक वर्गका लागि आयकर छुट, आवास कार्यक्रमको विस्तार तथा निजी क्षेत्रका लागि कर्जा प्रवाह तीव्र बनाउने उपाय प्रस्ताव गरेको छ । महासङ्घले सन् २०२६ मा ब्राजिलको औद्योगिक क्षेत्र केवल ०.६ प्रतिशतले मात्र विस्तार हुने अनुमान गर्दै आगामी वर्ष पनि गम्भीर आर्थिक चुनौती कायम रहने जनाएको छ ।