काठमाडौं । तामाकोशीमा भएको बस दुर्घटनामा मृत्यु हुनेको संख्या ९ जना पुगेको छ ।

रामेछापका प्रमुख जिल्ला अधिकारी श्यामकृष्ण थापाका अनुसार मृतकको संख्या ९ पुगेको हो ।

उनले बस खसेको स्थानमा खोजी गर्दा थप तीन जनाको शव फेला परेको बताए । त्यसअघि ६ जनाको शव फेला परेको थियो ।

मंगलबार बिहान उक्त बस काठमाडौंबाट ओखलढुंगाको पोकली जाँदै गरेको थियो । रामेछापको मचानेटार भन्ने ठाउँमा पुग्दा दुर्घटना भएको थियो । उक्त बस तामाकोशी नदीमा पुरैजसो डुबेको देखिन्छ ।

दुर्घटनामा घाइते भएकाहरूलाई उपचारका लागि रामेछाप सदरमुकाम मन्थली र सिन्धुलीको खुर्कोट पठाइएको छ ।

दुर्घटना भएको बस प्रदेश ०३–०१–९९५ ख ९९७५ नम्बरको हो ।

घटनास्थलमा सशस्त्र प्रहरीको गोताखोर टोली पुगेर खोजतलास गरिरहेको प्रहरीले जनाएको छ ।