काठमाडौं । राष्ट्रिय स्वतन्त्र पार्टी (रास्वपा)का निर्णयहरू आर्थिक अनियमितताबाट प्रेरित भएको गम्भीर आरोप लगाउँदै रास्वपाको मधेस प्रदेशको संस्थापक सभापति ममता शर्माले पार्टी छाडेकी छन् ।

यस्तो क्रियाकलापले आफ्नो आत्मसम्मान र राजनीतिक मूल्यहरूमा आँच आउने परिस्थिति बनेको शर्माले बताइन् ।

उनले राजीनामा दिँदै भनेकी छिन्, ‘यी सबै क्रियाकलापहरूको साक्षी बसेर म अब मौन रहिरहन असमर्थ छु ।’

संगठनमा दिनरात खटिने कार्यकर्ताहरूको योगदानबारे उचित मूल्याङ्कन नभएको तथा विधि र विधानविपरीत क्रियाकलापहरू भएको पनि उनको आरोप छ । यसबाहेक पार्टीका सिद्धान्तहरू व्यवहारमा कार्यान्वयन नभएको पनि बताइन् ।

यही २१ फागुनको निर्वाचनसम्बन्धी पार्टीले अवलम्बन गरेको पद्धति, पार्टीको निर्णय तथा कार्यशैली रास्वपाको स्थापनाकालीन मूल्य, पार्टी विधान र सार्वजनिक प्रतिबद्धताभन्दा ठीक विपरीत भएको अनुभव गरेको पनि बताएकी छन् ।