काठमाडौं । एकपछि अर्को नेताले राष्ट्रिय स्वतन्त्र पार्टी (रास्वपा) छाडिरहेका छन् । बुधबार मधेस प्रदेशका पूर्वसभापति ममता शर्माले पार्टी छाडेकामा बिहीबार बागमती प्रदेशका उपसभापति दिनेश गौतमले छाडे ।

गौतम ती नेता हुन्, जसले २०७९ को प्रतिनिधिसभा निर्वाचनमा काभ्रे–२ बाट १० हजार ५७३ मत प्राप्त गरेका थिए । उनले उम्मेदवार छनोट प्रक्रियादेखि पार्टी सञ्चालन विधिमै प्रश्न उठाउँदै साधारण सदस्यसमेत नरहनेगरी दल त्याग गरेका हुन् ।

‘उम्मेदवार छनोट प्रक्रिया विधान, मापदण्ड र आन्तरिक लोकतन्त्रविपरीत सञ्चालन गरिएको देखिन्छ । वर्षौैंदेखि पार्टीमा समर्पित कार्यकर्ताहरूलाई पाखा लगाई अन्य दलबाट हालसालै आएका व्यक्तिहरूलाई प्राथमिकता दिइएको छ, विशेष रूपमा, दुई–चार दिन अघाडिसम्म मोबाइल पसलमा काम गरिरहेका, गीत गाइरहेका, सामाजिक अभियन्ता भनेर हिँडिरहेका, चटकदारहरूलाई स्वार्थको आधारमा उम्मेदवार बनाइएको छ,’ उनको राजीनामा पत्रमा उल्लेख छ ।

जान्नेलाई छान्ने भनिए पनि उम्मेदवार छनोटमा चरम चलखेल भएको उनको आरोप छ । ‘पार्टीले सुरुमा २०७९ को निर्वाचनमा जान्नेलाई छान्ने भनेको थियो । तर व्यवहारमा तिनै जान्ने, सीमित व्यक्तिहरू, माथिका व्यक्तिहरूलाई चाकडी गर्ने, खुसी पार्ने, वरिपरि घुम्ने पात्रहरूलाई प्रत्यक्ष र समानुपातिक दुवैतर्फ प्राथमिकता दिइएको,’ उनले भने ।

गौतम र शर्मा दुवैले राजीनामा दिँदा पार्टीभित्र चरम आर्थिक चलखेलको गम्भीर आरोप लगाएका छन् ।

हालै रास्वपा नेता डा. प्रणय राणाले त आर्थिक ठगीको आरोप लगाउँदै पार्टी त्यागेका थिए ।

एकपछि अर्को नेताले निर्वाचनको मुखमा पार्टी छाड्दा रास्वपालाई स्वाभाविक धक्का लाग्ने टिप्पणी भइरहेको छ ।