काठमाडौं । नेकपा एमालेले प्रतिनिधि सभा निर्वाचनका लागि सार्वजनिक गरेको घोषणापत्रमा गरिब परिवारलाई लक्षित गर्दै २५ हजार रुपैयाँसम्मको ऋण मिनाहा गर्ने प्रमुख प्रतिबद्धता अघि सारेको छ ।

बिहीबार घोषणापत्र सार्वजनिक गर्दै पार्टी अध्यक्ष केपी शर्मा ओलीले २०८२ भदौसम्म बैंक तथा वित्तीय संस्थाबाट लिएको २५ हजार रुपैयाँसम्मको ऋण गरिब परिवारको हकमा मिनाहा गरिने बताएका छन् ।

उनले गरिबीको चक्रमा फसेका परिवारलाई आर्थिक राहत दिन यो कार्यक्रम ल्याइएको स्पष्ट पारे ।

एमालेका अनुसार देशभरका वास्तविक गरिब परिवार पहिचान गरी उनीहरूले लिएको साना कर्जा, सहुलियत ऋण वा बैंक तथा वित्तीय संस्थाबाट लिएको २५ हजार रुपैयाँसम्मको रकम सरकारद्वारा मिनाहा गरिनेछ । यसका लागि स्पष्ट मापदण्ड बनाएर कार्यान्वयन गरिने बताइएको छ ।

पार्टीले यस कार्यक्रमलाई आर्थिक पुनरुत्थानको प्रारम्भिक कदमका रूपमा प्रस्तुत गरेको छ । साना ऋणकै कारण कालोसूचीमा परेका वा पुनः ऋण लिन नसक्ने अवस्थामा पुगेका परिवारलाई पुनः आर्थिक गतिविधिमा फर्काउने उद्देश्य रहेको एमालेको दाबी छ ।

घोषणापत्रअनुसार यो निर्णय कार्यान्वयनका लागि सरकार गठन भएलगत्तै मन्त्रिपरिषद्को पहिलो बैठकबाटै समयसीमा तोकेर प्रक्रिया अघि बढाइनेछ ।