काठमाडौं । दाेलखाकाे तामाकाेशी गाउँपालिका-४ काे मालुमा रहेकाे गाेलेश्‍वर मावि मतदान केन्द्रमा स्थगित मतदान सुरु गरिएकाे छ ।

घर फर्किँदै गरेका मतदाता र दलका प्रतिनिधिहरुलाई निर्वाचन कर्मचारीहरुले माइकिङ गरेर बाेलाएका छन् । बिहान करिब ३०० मत खसेपछि विवाद भएकाे थियाे ।

नेपाली काङ्‍ग्रेस र नेकपाका कार्यकर्ताहरले बिहान त्यहाँ मतपत्र लुटेकाे एमाले र रास्वपाले आराेप लगाएका छन् । त्यही क्रममा दलका प्रतिनिधिले निर्वाचनमा खटिएका कर्मचारीमाथि हातपातसमेत गरेका थिए । त्यसपछि विवाद बढ्याे । विवाद बढ्दै जाँदा बिहान ११ बजेतिर प्रहरीले हवाई फायरसमेत गरेको थियो ।

प्रहरीले केही बुथ एजेन्टहरूलाई नियन्त्रणमा लिएको छ । तामाकोशी-४ का यज्ञबहादुर श्रेष्ठ, अनिल श्रेष्ठ, अर्जुन योगीलगायत प्रहरी नियन्त्रणमा छन् । काङ्‍ग्रेस र नेकपाले पक्राउ परेकाहरुलाई रिहा गर्न माग गरेका छन् ।