काठमाडौं । नेकपा एमालेकी सचिव पद्‍मा अर्यालले निर्वाचन परिणामलाई स्वीकार गर्दै अब एमाले सशक्त प्रतिपक्षको भूमिकामा उत्रिने बताएकी छन् ।

बिहीबार प्रतिनिधिसभाको समानुपातिकतर्फ निर्वाचित सांसदको प्रमाणपत्र निर्वाचन आयाेगबाट प्राप्त गरेपछि उनले यस्तो बताएकी हुन् ।

उनले आगामी सरकारको नेतृत्व गर्न लागेको राष्ट्रिय स्वतन्त्र पार्टीलाई सकरात्मक काममा सहयोग गर्ने पनि बताइन् । उनले एमाले स्थायित्वको पक्षमा रहेकोले निर्वाचनले देशलाई राजनीतिक स्थिरता दिएको उल्लेख गरेकी छन् ।

सचिव अर्यालले रोजगारी सिर्जना, उत्पादनमा वृद्धि, महिला र ज्येष्ठ नागरिकको सम्मान लगायतका काममा सरकार केन्द्रित हुनुपर्नेमा जोड दिइन् ।

राजनीतिक अस्थिरता नै विकास र समृद्धिको प्रमुख बाधक भएको उनकाे भनाइ छ । नयाँ शक्तिले झन्डै दुई तिहाइ जनसमर्थन पाएको अवस्थामा सरकारप्रति जनताको अपेक्षा अझ उच्च रहेको बताइन्।

यस्तै उनले एमालेले निर्वाचनमा पाएको असफलताको समिक्षा गर्ने गरेर कमी कमजोरीलाई सुधार गर्ने दाबी गरेकी छन् ।