काठमाडौं । नेपाली बाहेक अन्य भाषामा शपथ लिन चाहने प्रतिनिधि सभा सदस्यको संख्या ६३ पुगेको छ।

संघीय संसद् सचिवालयका अनुसार यी सांसदहरूले इमेलमार्फत र भौतिकरूपमै उपस्थित भएर आफ्ना मातृभाषामा शपथ लिन इच्छा व्यक्त गरेका हुन्।

नवनिर्वाचित प्रतिनिधि सभा सदस्यहरूको पद तथा गोपनीयताको शपथ आज दिउँसो २ बजे तय गरिएको छ।
शपथ ग्रहण गराउने जिम्मेवारी प्रतिनिधि सभाका ज्येष्ठ सदस्य अर्जुननरसिंह केसीलाई दिइएको छ।

सचिवालयले सांसदहरूलाई निर्वाचन आयोगबाट प्रदान गरिएको प्रतिनिधि सभा सदस्यको प्रमाणपत्र, नेपाली नागरिकताको प्रतिलिपि र हालसालै खिचिएको पासपोर्ट साइजका दुई फोटो सहित तोकिएको समयभन्दा दुई घण्टा अगाडि उपस्थित हुन आग्रह गरेको छ।