काठमाडौं। राष्ट्रिय स्वतन्त्र पार्टी (रास्वपा) की केन्द्रीय सदस्य सोविता गौतम कानुनमन्त्री बनेकी छन्।

चितवन क्षेत्र नं. ३ बाट चुनाव लडेर भरतपुर महानगरकी पूर्वमेयर रेनु दाहाललाई पराजित गर्दै उनले ५९ हजार २७७ मत प्राप्त गरेकी थिइन्।

रास्वपाले पहिलो पटक चुनावमा प्रतिस्पर्धा गर्दा गौतम काठमाडौं–२ बाट उम्मेदवार बनेकी थिइन्। पहिलो प्रयासमै विजयी हुँदै उनले त्यतिबेला पूर्वसभामुख ओनसरी घर्तीलाई हार मान्न बाध्य पारिन्।

राजनीतिमा प्रवेश गर्नु अघि गौतम सञ्चार क्षेत्रमा सक्रिय थिइन्। उनले नेपाल टेलिभिजनमा ‘स्वास्थ्य सरोकार’ जस्ता स्वास्थ्यसम्बन्धी कार्यक्रम सञ्चालन गर्थिन्। कानुनकी विद्यार्थी समेत रहेकी उनले त्रिभुवन विश्वविद्यालयअन्तर्गत नेशनल कलेजबाट बीए एलएलबी पूरा गरेकी छन्।

तीन वर्षे संसदीय कार्यकालमा उनले संसदको कानुन, न्याय तथा मानवअधिकार समितिकी सदस्यका रूपमा भूमिका निर्वाह गरेकी थिइन्।