काठमाडौं । प्रतिनिधिसभा निर्वाचनपछि राष्ट्रिय प्रजातन्त्र पार्टी (राप्रपा)मा आन्तरिक असन्तुष्टि चुलिएको छ । अध्यक्ष राजेन्द्र लिङ्देनको कार्यशैलीप्रति तीब्र आलोचना भइरहेको छ ।

पार्टीमा अराजकता र स्वेच्छाचारिता मौलाएको, वैचारिक बहस पटक्कै नभएको र पार्टीलाई अनुशासनमा सञ्चालन गर्न अध्यक्ष लिङ्देन अक्षम भएको भन्दै उनको नेतृत्वशैलीमाथि पनि प्रश्न उठेको छ ।

बुधबार पार्टी केन्द्रीय कार्यसम्पादन समिति सदस्य जनकराज पाठकले पार्टीमा वैचारिक बहस हराउँदै गएको, व्यक्तिवाद हाबी भएको र संगठनात्मक अनुशासन कमजोर बनेको भन्दै लिङ्देनको आलोचना गरे ।

उनले सामाजिक सञ्जाल फेसबुकमा लेखे, ‘पार्टी जीवनको इतिहासमै कार्यकर्तादेखि नेतृत्व तहसम्म यत्तिको राजनैतिक अराजकता मैले देखेको थिइनँ ।’

लिङ्देनको नाम नलिइकन उनले नयाँ नेतृत्व आएपछि पार्टीभित्र कुनै पनि गम्भीर बहस नभएको भन्दै उनले भनेका छन्, ‘आत्मा साक्षी राखेर भन्दा पार्टीमा नयाँ नेतृत्व स्थापित भएपछि आजका दिनसम्म कहीँ कतै कुनै सैद्धान्तिक वा राजनीतिक बहस फिटिक्कै छैन ।’

पाठकले लिङ्देनले पक्षपातपूर्ण व्यवहार गरेको आरोप लगाएका छन् । ‘आफू निकटलाई आममाफी, अन्यलाई ठाडै कारबाही । परम्परा र विधिको अन्त्य भएको छ,’ उनले असन्तुष्टि पोखे ।

उनले यस्तो प्रवृत्तिले संगठनभित्र विश्वास संकट पैदा गरेको बताएका छन् । अध्यक्ष लिङ्देननिकट कार्यकर्ताहरूलाई संकेत गर्दै उनले पार्टीमा अराजकता मौलाएको भन्दै गम्भीर चिन्ता प्रकट गरे ।

‘कसले छिटो बोल्ने अनि कसलाई नंगाउने यति छ दैनिकी,’ उनले भने । नक्कली नाम प्रयोग गरेर आक्रमण गर्ने प्रवृत्तिसमेत बढेको उनको दाबी छ ।

२१ फागुनमा भएको निर्वाचनमा अपेक्षित परिणाम नआएपछि पनि कुनै गम्भीर समीक्षा नभएको भन्दै अध्यक्ष लिङ्देनप्रति उनले प्रश्न उठाएका छन् ।

‘निर्वाचनमा अपेक्षित परिणाम आएन, किन आएन भन्ने बहस वा समीक्षा समेत हुँदैन,’ निर्वाचन भएको महिना दिन बित्दा पनि समीक्षा नभएपछि पाठकले गुनासो गरेका हुन् ।

उनले पार्टीभित्रको संकट समाधानका लागि ताजा जनादेश आवश्यक रहेको बताएका छन् ।