काठमाडौं। केही समययता बन्द रहेको खुला मञ्च आजबाट पुनः सञ्चालनमा आएको छ। अब अब खुला मञ्चमा योगा, ध्यान तथा साउण्ड हिलिङजस्ता गतिविधि गर्न सकिने भएको छ।

बिहीबार बिहान काठमाडौं महानगरपालिकाकी कार्यवाहक प्रमुख सुनिता डंगोलको सहभागितामा काठमाडौँ महानगरपालिकाले खुला मञ्च पुनः खुला गरेको हो।

खुला मञ्चको उद्घाटन गर्दै डंगोलले भनिन्,’यो खुला मञ्चलाई आफ्नै घरको पार्क सम्झनुहोला। यो आजदेखि आम नागरिक सबैका लागि खुला गरिएको छ। यो ठाउँलाई आफ्नै ठाउँ मानेर, आफ्नै घरलाई जति माया गर्छौं हामीले आफ्नो घर वा छिमेकीको पार्कलाई जति माया गर्छौं, त्यसैगरी माया गर्दै यो खुलामञ्चको प्रयोग सबैजनाले गर्न अनुरोध गर्दछु’

उनले खुला मञ्च व्यवस्थापनका लागि सबैलाई आग्रह समेत गरेकी छन्।

‘यो खुलामञ्चको व्यवस्थापन र सम्हालका लागि यसलाई दीर्घकालीन रूपमा व्यवस्थापन गर्न यहाँको कम्युनिटीको सहभागिता त्यत्तिकै आवश्यक छ। जसका लागि हामीले वडा नम्बर २७ र २८ का विभिन्न सरोकारवाला निकायहरूसँग पनि सहकार्य गर्नेछौँ’ उनले भनिन्।

यसअघि बालेन्द्र शाह मेयर रहेका बेला खुला मञ्चभित्रका अस्थायी संरचना हटाएर दुबो रोप्ने काम गरिएको थियो। महानगरले अहिले सो स्थानलाई सार्वजनिक प्रयोगका लागि व्यवस्थित गर्दै स्वास्थ्य र मानसिक सन्तुलनसँग सम्बन्धित गतिविधिमा केन्द्रित गर्ने योजना अघि बढाएको जनाएको छ।