काठमाडौं। उच्च पदस्थ व्यक्तिहरू अदालतबाट छुटेको विषयमा गृहमन्त्री सुधन गुरुङले असन्तुष्टि व्यक्त गरेका छन्। गृहमन्त्री बनेपछि आफूले सुशासनलाई प्राथमिकतामा राख्दै काम गरिरहेको उल्लेख गर्दै उनले कार्की आयोगको प्रतिवेदनसमेत कार्यान्वयनमा ल्याइसकेको बताए। तर, अदालतबाट आरोपितहरू छुट्नुले आफू निराश भएको उनको भनाइ छ।

‘मलाई लाग्थ्यो, गृहमन्त्री भएपछि धेरै सुधार गर्न सकिन्छ,’ उनले भने, ‘तर अहिले त न्यायाधीश नै सबैभन्दा शक्तिशाली जस्तो लाग्न थालेको छ।’

विगतका घटनाबाट सिक्दै अब अदालतबाट नछुट्ने गरी कसरी कारबाही अगाडि बढाउने भन्ने विषयमा अध्ययन गरिरहेको उनले बताए। ‘अहिले म रातिरातिसम्म कानुनका किताब पढिरहेको छु,’ उनले भने, ‘प्रहरीलाई पनि प्रमाण बलियो बनाएर मुद्दा अघि बढाउन निर्देशन दिइसकेको छु।’

गुरुङले कानुनी अध्ययनका लागि छुट्टै टोली गठन गरिएको जानकारी दिँदै अब यस्तो अवस्था दोहोरिन नदिने प्रतिबद्धता जनाए।

यसअघि २३ र २४ भदौको घटनामा गठित गौरीबहादुर कार्की आयोगको सिफारिसअनुसार पक्राउ परेका पूर्वप्रधानमन्त्री केपी शर्मा ओली, पूर्वगृहमन्त्री रमेश लेखक तथा पूर्वमन्त्री दिपक खड्का अदालतको आदेशपछि रिहा भएका थिए।