काठमाडाैं। इरानले रणनीतिक रूपमा महत्त्वपूर्ण तेल ढुवानी मार्ग स्ट्रेट अफ होर्मुजलाई पुनः व्यावसायिक जहाजहरूको आवागमनका लागि खुला गरेको घोषणा गरेको छ। विदेशमन्त्री अब्बास अराघ्चीले युद्धविराम अवधिमा तोकिएका सुरक्षित मार्गहरू प्रयोग गर्न जहाजहरूलाई आग्रह गरेका छन्, बीबीसीले जनाएको छ।

अमेरिका र इजरायलले २८ फेब्रुअरीमा आक्रमण गरेपछि इरानले उक्त मार्ग अवरुद्ध गरेको थियो। अमेरिका–इरानबीचको युद्धविराम २२ अप्रिलसम्म रहने तय गरिएको छ। यद्यपि अमेरिकी राष्ट्रपति डोनाल्ड ट्रम्पले शान्ति सम्झौता नहुँदासम्म इरानी बन्दरगाहमाथिको नाकाबन्दी कायम रहने बताएका छन्।

यता, समुद्री सुरक्षासम्बन्धी निकायहरूले मार्ग पूर्ण रूपमा सुरक्षित भएको पुष्टि गर्न बाँकी रहेको बताएका छन्। जहाज ट्र्याकिङ डाटाअनुसार हालसम्म आवागमन अपेक्षाकृत कम नै देखिएको छ। साथै, इरानले सैन्य जहाजहरूको आवागमनमा भने अझै प्रतिबन्ध कायम रहने स्पष्ट पारेको छ।

विश्वको झण्डै २० प्रतिशत तेल तथा ग्यास यही मार्गबाट ओसारपसार हुने भएकाले हालको तनावले अन्तर्राष्ट्रिय अर्थतन्त्रमा प्रभाव पारेको छ। पछिल्ला घटनाक्रमपछि तेलको मूल्य केही घटे पनि मार्ग पूर्ण रूपमा सुरक्षित भइसकेको हो कि होइन भन्ने विषयमा अझै अनिश्चितता कायम छ।