काठमाडौं। राष्ट्रिय प्रजातन्त्र पार्टी (राप्रपा)का महामन्त्री धवल शम्शेर राणासहित ५ जना नेताविरुद्ध पार्टी अनुशासन समितिमा उजुरी परेको छ।

पार्टी स्रोतका अनुसार वैशाख ३ गते महामन्त्री राणा, प्रल्हाद साह, केन्द्रीय सदस्य धनसुर शाही, रन्जन कार्की तथा काठमाडौं जिल्ला अध्यक्ष नवराज सिंखडाविरुद्ध उजुरी दर्ता भएको हो।

उनीहरूविरुद्ध पार्टी हितविपरीत गतिविधि गरेको आरोप लगाइएको छ। उजुरीमा विशेषगरी महामन्त्री राणाका गतिविधि र अभिव्यक्ति पार्टीको हितविपरीत रहेको उल्लेख गरिएको छ।

हालै काठमाडौंमा गरिएको एक भेलामा राणासहितका नेताहरूले एक साताभित्र महाधिवेशन मिति तोक्न र स्वतन्त्र संयोजकको नेतृत्वमा महाधिवेशन आयोजक समिति गठन गर्न माग गरेका थिए।

उजुरीपछि राप्रपाको अनुशासन समिति सोमबार दिउँसो बस्दैछ। उपाध्यक्ष रोशन कार्कीको अध्यक्षतामा समिति सक्रिय रहेको छ। समिति बैठकले प्रारम्भिक छलफल गर्ने बताइएको छ।