काठमाडौं।  जेन-जी विद्रोहमा पानी बाँडेर एकैपटक राष्ट्रिय राजनीतिमा उदाएका गृहमन्त्री सुधन गुरुङ ‘उम्लियो र पोखियो’ को स्थितिमा पुगेका छन् । उनलाई गृहमन्त्रीबाट हटाउने प्रधानमन्त्री बालेन र राष्ट्रिय स्वतन्त्र पार्टी (रास्वपा)का सभापति रवि लामिछानेपछि चौतर्फी दबाब बढेको छ ।

यसअघि बीमा बोर्डको सदस्यमा श्रीमतीको पुनःनियुक्ति आरोपपछि श्रम, रोजगार तथा सामाजिक सुरक्षामन्त्री दीपक शाहलाई हटाइएको थियो । अब पालो गृहमन्त्री सुधन गुरुङको देखिएको छ । सुशासन, पारदर्शीता र भ्रष्टाचार अन्त्यको मागसहित भएको जेन–जी विद्रोह र गत २१ फागुनमा भएको निर्वाचनको जनादेश अनुसार गठित बालेन सरकारका गृहमन्त्री गुरुङ सम्पत्ति शुद्धीकरणसम्बन्धी छानबिनमा रहेका विवादास्पद व्यापारी दीपक भट्ट र व्यापारी घराना शंकर ग्रुप लगायतसँग बिजनेस पार्टनर भएको विषय बाहिरिएको थियो।

प्रमाण नै सार्वजनिक भएपछि उनी चुपचाप छन् । सोमबार बिहानै उनलाई हटाउनेबारे महामन्त्री कविन्द्र बुर्लाकोटी र अनुशासन आयोगका कार्यवाहक अध्यक्ष रमाकान्त रिमालबीच छलफल भएको थियो । स्रोतको दाबीमा गृहमन्त्री गुरुङलाई हटाउनेबारे सोमबारको सचिवालय बैठकमा छलफल हुने छ ।

विगतमा गुरुङ भ्रष्टाचारीहरू कसैलाई नछाड्ने भन्थे तर उनी आफैं बिचौलियाको साझेदार रहेको खुलेको हो । स्रोत स्पष्ट नभएका उनको अकुत सम्पत्ति हालै सार्वजनिक भएको थियो । यसअघि उनले चढेको रातो गाडी अर्कै व्यापारीको रहेको खुलेको थियो ।