काठमाडौं । अर्थमन्त्री डा. स्वर्णिम वाग्ले र संयुक्त राज्य अमेरिकाका सहायक विदेशमन्त्री एप पल कपुरबीच भेटवार्ता भएको छ। मंगलबार सिंहदरबारस्थित अर्थ मन्त्रालयमा शिष्टाचार भेट भएको हो।

भेटका क्रममा हालै सम्पन्न निर्वाचनपछि गठित वर्तमान सरकार र अमेरिकी सरकारबीच सम्भावित साझेदारीका क्षेत्र, लगानी प्रवर्द्धन तथा द्विपक्षीय सहयोगका विषयमा गहन छलफल भएको छ।

छलफलका क्रममा अर्थमन्त्री डा. वाग्लेले सरकारको मुख्य प्राथमिकता सुशासन, आर्थिक सुधार र गुणस्तरीय भौतिक पूर्वाधार निर्माण रहेको बताए। उनले पुराना तथा अनावश्यक कानुन खारेज गर्दै नयाँ कानुन निर्माणमार्फत लगानीमैत्री वातावरण सिर्जना गर्नु सरकारको प्राथमिकतामा रहेको स्पष्ट पारे।

साथै, उनले अमेरिकी तथा गैरआवासीय नेपाली लगानीकर्ताबाट विशेषगरी पर्यटन, स्वच्छ ऊर्जा र सूचना प्रविधि क्षेत्रमा लगानीको अपेक्षा गरिएको उल्लेख गरे।

अमेरिकी सहायक विदेशमन्त्री कपुरले नेपाल र अमेरिकाबीचको ऐतिहासिक सम्बन्ध आगामी दिनमा अझ सुदृढ हुने विश्वास व्यक्त गरे। उनले हालै सम्पन्न शान्तिपूर्ण निर्वाचनपछि बनेको सरकारले अघि सारेका सुधार कार्यक्रमहरूलाई अमेरिकी राष्ट्रपति र अमेरिकी जनताले सकारात्मक रूपमा हेरिरहेको पनि बताए।