काठमाडौं। नेपाल राष्ट्र बैंक ले बुधबार बैंक तथा वित्तीय संस्थाबाट ४० अर्ब रुपैयाँ निक्षेप संकलन गर्ने भएको छ।

निक्षेप संकलन उपकरण प्रयोग गर्दै केन्द्रीय बैंकले उक्त रकम १६८ दिनका लागि संकलन गर्न लागेको हो। दिउँसो ३ बजेसम्म अनलाइन बोलकबोलमार्फत संकलन गरिने यस रकमको सावाँ र ब्याज भुक्तानी असोज २१ गते गरिने राष्ट्र बैंकले जनाएको छ।

यस प्रक्रियामा ‘क’, ‘ख’ र ‘ग’ वर्गका बैंक तथा वित्तीय संस्थाहरू सहभागी हुन पाउनेछन्। सहभागी संस्थाहरूले घटीमा १० करोड र बढीमा ५ करोडले भाग गर्दा निःशेष भाग जाने गरी कुल आह्वान रकमसम्म बोल लगाउन सक्नेछन्।

संकलित रकम बैंक तथा वित्तीय संस्थाहरूले राष्ट्र बैंकबाहेक अन्य निकायमा समेत धितोका रूपमा प्रयोग गर्न सक्ने व्यवस्था गरिएको छ।