काठमाडौं । प्रधानमन्त्री बालेन्द्र शाहले आफ्नो हालको सांगीतिक यात्रामा प्रयोग गरेको चर्चित गीत ‘गरिबको चमेली बोल्दिने कोही छैन…’ चोरी गरेको आरोप लागेको छ। उक्त गीतका स्रष्टा रामेश्वर श्रेष्ठ (रामेश) ले एक अन्तर्वार्ताका क्रममा यो गीत प्रधानमन्त्रीले अनुमति बिना उपयोग गरेको बताएका हुन्। उनका अनुसार गीत सार्वजनिक रूपमा प्रयोग गर्दा सर्जकको अनुमति र उचित श्रेय दिनु कलाकारहरूको सम्मानका लागि अनिवार्य हो, तर यसमा त्यस्तो प्रक्रिया अपनाइएन।

यद्यपि, गायक रामेशले यस विषयलाई कानुनी विवादमा नलैजाने स्पष्ट गरेका छन्। रोयल्टीको दाबी पनि नगर्ने बताउँदै उनले आफूलाई आर्थिक पक्षभन्दा गीतको मर्म र सामाजिक सन्देश महत्त्वपूर्ण लाग्ने बताए। उनका अनुसार गीतमा उठाइएका विषयहरू गरिब, निमुखा, पीडित र सीमान्तकृत वर्गको आवाज राजनीतिक पदमा बसेकाहरूले व्यवहारमै कार्यान्वयन गर्न जरुरी छ।

रामेशले विगतका धेरै राजनीतिक नेताहरूले पनि आफ्ना गीत र आवाजलाई सत्तामा पुग्ने साधनका रूपमा मात्रै प्रयोग गरेको आरोप लगाए। उनका अनुसार गीत गाउँदै जनताको भावना उठाउने काम त धेरैले गर्छन्, तर शासनमा पुगेपछि यिनै वर्गको पक्षमा वास्तविक काम गर्नेहरू दुर्लभ हुन्छन्।

प्रधानमन्त्री शाहले उक्त गीतलाई र्‍याप शैलीमा गाउँदा युवा पुस्तामाझ यसको लोकप्रियता झनै बढेको थियो। तर गायक रामेशले लोकप्रियता मात्र पर्याप्त नहुने भन्दै अब व्यवहारमै ‘गरिबको चमेली’ को पक्षमा काम गरेर देखाउन प्रधानमन्त्रीसहित सत्ताधारीहरूलाई सुझाव दिएका छन्।