काठमाडौं । स्मार्ट टेलिकममा भएको अर्बौँ रुपैयाँको अनियमितता प्रकरणसँग आफ्नो नाम जोडिएकोप्रति पूर्वमन्त्री तथा राष्ट्रिय स्वतन्त्र पार्टी (रास्वपा)का सांसद जगदीश खरेलले कडा आपत्ति जनाएका छन्।

सामाजिक सञ्जाल र केही सञ्चारमाध्यममा आफूलाई अनियमिततासँग जोडेर प्रस्तुति गरिन थालेपछि खरेलले सार्वजनिक रूपमा स्पष्टिकरण दिँदै आरोपहरू ‘पूर्णतः निराधार’ भएको दाबी गरेका छन्।

खरेलले भनेका छन्, ‘अहिले म माथि मिडिया ट्रायल भएको छ । केही सञ्चारमाध्यम तथा सामाजिक सञ्जालमा मेरो नाम जोडेर नियोजित रूपमा ‘फेक न्युज’ फैलाइएको छ । कृपया भ्रममा नपर्नु होला ।’

अहिले आफू कार्यक्रमको सिलसिलामा स्विजरल्याण्डमा रहेको र गल्ती नगरेको भन्दै अलिकति पनि डर नभएको बताएका छन् ।

उनले आफू इमानदार भएको भन्दै भने, ‘सोधे हुन्छ, खोजे हुन्छ, तर सत्य सत्य नै हुन्छ । मेरो इमान नै मेरो गन्तब्यको लागि प्रयाप्त छ । यस्ता भ्रामक, नियोजित तथा कपोल्कल्पित प्रहारले मेरो चरित्र र राजनीतिक भविष्यमाथी प्रहार गर्छु भनेर नसोचे हुन्छ ।’

उनले कानुनी उपचार खोज्ने चेतावनी दिएका छन् ।