काठमाडौं । सरकारको वार्षिक नीति तथा कार्यक्रममाथि प्रतिनिधिसभामा छलफल प्रारम्भ गरियोस् भन्ने प्रस्ताव टेबल गरिएको छ । बुधबार बसेको दोस्रो बैठकमा प्रधानमन्त्री बालेन्द्र शाह का तर्फबाट अर्थमन्त्री डा. स्वर्णिम वाग्ले ले उक्त प्रस्ताव प्रस्तुत गरेका हुन् ।

सभामुख डोलप्रसाद अर्याल ले अर्थमन्त्री वाग्लेलाई प्रस्ताव राख्न समय दिएपछि विपक्षी दलका सांसदहरूले विरोध जनाएका थिए । त्यसपछि उनले प्रमुख प्रतिपक्षी दलका नेता भीष्मराज आङ्देम्बे लाई आफ्ना धारणा राख्न समय दिएका थिए ।

सभामुखको समय पाएपछि आङ्देम्बेले नीति तथा कार्यक्रमको जवाफ दिन प्रधानमन्त्रीको उपस्थिति अनिवार्य हुनुपर्ने अडान दोहोर्‍याउँदै आफूहरूले प्रस्ताव टेबल गर्न दिएर सदनलाई सहयोग गरेको बताए । साथै उनले प्रधानमन्त्रीको उपस्थितिका लागि रुलिङ गर्न सभामुखसँग माग गरे ।

जवाफमा सभामुख अर्यालले आफ्नो ध्यानाकर्षण भएको जनाउँदै नीति तथा कार्यक्रममा ३५ वटा संशोधन प्रस्ताव दर्ता भएको जानकारी दिए । उनले प्रधानमन्त्रीसँग छलफल गरेर मात्र उपस्थित हुने वा नहुनेबारे निष्कर्ष निकाल्न सकिने भन्दै बैठक सञ्चालन गर्न आग्रह गरे ।

तर विपक्षी सांसदहरूले सभामुखको आग्रह अस्वीकार गर्दै नाराबाजी जारी राखे । यही क्रममा रास्वपा सांसदले बोल्ने समय माग गरे पनि सभामुखले अनुमति नदिएको जनाइएको छ ।

त्यसपछि आङ्देम्बेलाई एक मिनेटको समय दिइएको थियो । उनले समय सीमा तोक्नु गलत भएको टिप्पणी गर्दै प्रधानमन्त्रीले नीति तथा कार्यक्रमको जवाफ दिनुपर्ने विषय अस्वीकार्य नभएको बताए । उनले सदनलाई अवरुद्ध होइन, निकास र छलफलतर्फ लैजान सभामुखलाई रुलिङ गर्न आग्रह गरे ।
बालेनको सट्टा स्वर्णिमले गरे प्रस्ताव पेश