बालेनतन्त्रको विकास गर्न खोजिएको हो?: एमाले
Nepal One HD ३१ वैशाख २०८३ ११:३७
काठमाडौं। नेकपा एमालेका सचेतक ऐन महरले प्रतिनिधिसभामा प्रधानमन्त्रीमाथि कडा प्रश्न उठाउँदै संसद्, लोकतन्त्र र संविधानप्रतिको जिम्मेवारीबारे सरकारलाई कटाक्ष गरेका छन् ।
उनले संसद् नेपाली जनताको ठूलो बलिदान र शहिदहरूको संघर्षबाट प्राप्त भएको भन्दै नेपालको संविधानको धारा ७४ अनुसार मुलुक संघीय लोकतान्त्रिक गणतन्त्रात्मक शासन प्रणालीमा अघि बढ्नुपर्ने उल्लेख गरे ।
तर प्रधानमन्त्री वालेन्द्र (बालेन) शाहले लोकतान्त्रिक अभ्यासभन्दा ‘बालेनतन्त्र’ विकास गरिरहेको आरोप लगाए ।
सचेतकले नीति तथा कार्यक्रममाथि उठेका जनताका प्रश्नको जवाफ दिन प्रधानमन्त्री संसद्मा उपस्थित नभएको भन्दै आपत्ति जनाए । ‘यो केवल नियमावलीको विषय होइन, संसद् र राष्ट्रपतिको समेत अपमान भइरहेको छ,’ उनले भने ।
उनले प्रधानमन्त्री संसद्मा अनुपस्थित रहेर फेरि सुकुम्बासी बस्तीमा डोजर चलाउने तयारीमा लागेको हो भन्दै व्यंग्यसमेत गरे । ‘काम गर्दैछु भन्ने तर संसद्मा नआउने, आखिर कस्तो काम भइरहेको हो ?’ भन्दै उनले सरकारको कार्यशैलीमाथि प्रश्न उठाए ।
