चितवन । भरतपुरस्थित जिल्ला कारागारमा भाइरल ज्वरोको संक्रमण फैलिएको छ। हालसम्म कारागारका ५० जना कैदी भाइरल ज्वरोबाट प्रभावित भएको कारागार प्रशासनले जनाएको छ।

जिल्ला कारागारका प्रमुख खेमेन्द्र डुमानाका अनुसार पछिल्लो समय दैनिक पाँचदेखि सात जनासम्म कैदीमा भाइरल ज्वरोको लक्षण देखिने गरेको छ। उनका अनुसार संक्रमितको संख्या दिनप्रतिदिन बढ्दो क्रममा छ।

हाल कारागारमा ७१२ जना कैदीबन्दी रहेका छन्। कारागारको क्षमता ६०० जनाको भए पनि क्षमताभन्दा बढी कैदीबन्दी राखिएको छ। यहाँ ५० जना महिला र ६५० जना पुरुष कैदीबन्दी रहेका छन्।

भाइरल ज्वरोबाट प्रभावित कैदीबन्दीलाई छुट्टै कोठामा राखेर उपचार भइरहेको कारागार प्रशासनले जनाएको छ। जिल्ला जनस्वास्थ्य कार्यालय र भरतपुर महानगरपालिकाको सहयोगमा आवश्यक औषधि तथा स्वास्थ्य सामग्रीको व्यवस्था गरिएको प्रमुख डुमानाले बताए।

कारागार प्रशासनले संक्रमण थप फैलिन नदिन स्वास्थ्य निगरानी तथा आवश्यक सतर्कता अपनाइएको जनाएको छ।