काठमाडौं । फुटबलको महाकुम्भ फिफा वर्ल्डकप २०२६ आज (जुन ११) देखि औपचारिक रूपमा सुरु भएको छ। अबका ३९ दिन विश्व फुटबल इतिहासकै सबैभन्दा रोमाञ्चक र प्रतिस्पर्धात्मक अवधि हुने अपेक्षा गरिएको छ।

यसपटकको विश्वकप संयुक्त रूपमा अमेरिका, क्यानडा र मेक्सिकोमा आयोजना हुँदैछ। प्रतियोगितामा ४८ राष्ट्र सहभागी छन् भने कुल १०४ खेलहरू खेलाइनेछन्। जुलाई १९ को रात न्यु जर्सीस्थित मेटलाइफ स्टेडियममा हुने फाइनलसँगै नयाँ विश्व च्याम्पियनको टुंगो लाग्नेछ।

फुटबलप्रेमीहरू अहिले नै फाइनललाई लिएर उत्साहित छन्। जुलाई १९ को रात कसले ट्रफी उचाल्ला भन्ने प्रश्नले विश्व फुटबल बजार तताएको छ। टिमहरूको प्रदर्शन, स्टार खेलाडीहरूको फर्म र समूह चरणको नतिजाले यसपटकको विश्वकपलाई थप अनिश्चित र रोमाञ्चक बनाएको छ।

विश्वकप सात समुद्रपारि भए पनि नेपालमा यसको क्रेज अत्यन्तै उच्च देखिएको छ। राजधानीदेखि जिल्लासम्म फुटबलप्रेमीहरू प्रतियोगिताप्रति आकर्षित भएका छन्।

बजारमा विभिन्न देशका जर्सी किन्नेहरूको भीड बढेको छ। समर्थकहरूले आफूले मन पराएको टोली र खेलाडीको जर्सी लगाएर सामाजिक सञ्जालमा फोटो पोस्ट गर्ने क्रम पनि बढेको छ।

विश्वकप सुरु भएसँगै नेपाली बजारमा जर्सीको बिक्री उल्लेख्य रूपमा बढेको छ। तीन–चार सय रुपैयाँदेखि तीन–चार हजार रुपैयाँसम्मका जर्सीहरू बजारमा उपलब्ध छन्।

विभिन्न गुणस्तर र डिजाइनका जर्सी उपलब्ध भएकाले ग्राहकहरू आफ्नो रोजाइ र बजेटअनुसार किनमेल गरिरहेका छन्।

तस्वीरहरू:

विश्वभरका फुटबल समर्थकहरू आफ्ना मनपर्ने टोलीको समर्थनमा तयारीमा छन्। रंगीन वातावरण, समर्थन अभियान र सामाजिक सञ्जालमा बढ्दो सहभागिताले विश्वकपको माहोललाई अझ उत्सवमय बनाएको छ।

फुटबल विश्लेषकहरूका अनुसार यसपटकको विश्वकप केवल खेल मात्र नभई विश्वव्यापी सांस्कृतिक उत्सवका रूपमा समेत स्थापित हुने अपेक्षा गरिएको छ।