एजेन्सी। अमेरिकाको संघीय अनुसन्धान ब्युरो (एफबीआई) ले ह्वाइट हाउसमा आयोजित यूएफसी ‘फ्रिडम २५०’ कार्यक्रमलाई लक्षित गरिएको कथित आक्रमणको योजना विफल पारेको जनाएको छ।

अमेरिकी अधिकारीहरूका अनुसार बहुराज्यीय अनुसन्धान अभियान सञ्चालन गर्दै पाँच जना संदिग्धलाई पक्राउ गरिएको हो।

एफबीआईका निर्देशक क्यास पटेलले जुन १० मा सम्भावित खतराबारे सूचना प्राप्त भएपछि विभिन्न सुरक्षा निकायसँगको समन्वयमा तत्काल कारबाही गरिएको बताएका छन्। उनका अनुसार कार्यक्रमलाई लक्षित गरी तयार पारिएको योजना कार्यान्वयन हुनुअघि नै रोकिएको थियो।

अनुसन्धानसँग सम्बन्धित अदालती कागजातहरूका अनुसार आक्रमणकारीहरूले विस्फोटक पदार्थ जडित ड्रोन प्रयोग गरी कार्यक्रमस्थल नजिकका क्षेत्रमा अराजकता सिर्जना गर्ने तथा त्यसपछि भागदौड मच्चिएको भीडलाई लक्षित गर्दै गोली प्रहार गर्ने योजना बनाएका थिए।

केही दस्तावेजहरूमा ह्वाइट हाउसको सुरक्षात्मक घेरातर्फ थप आक्रमण गर्ने सम्भावित रणनीतिबारे पनि उल्लेख गरिएको छ।

अमेरिकी न्याय मन्त्रालयका अनुसार पक्राउ परेकामध्ये ओहायोका १९ वर्षीय टाइसेन सी. प्रोपर, क्यालिफोर्नियाका २४ वर्षीय ब्रायन ओमार रोआ र ३२ वर्षीय माइकल एलन थोमस, मिसौरीका ३२ वर्षीय ड्यानियल के. एस्क्रिज तथा नेब्रास्काका ३१ वर्षीय अब्राहम हर्मोसिलो अल्भारेज रहेका छन्। उनीहरूमाथि हत्या सम्बन्धी षड्यन्त्र तथा अन्य संघीय अभियोग लगाइएको छ।

अदालती कागजातअनुसार संदिग्धहरूले अमेरिकी राष्ट्रपति डोनाल्ड ट्रम्प, उपराष्ट्रपति जेडी भान्स, इजरायली प्रधानमन्त्री बेन्जामिन नेतन्याहु तथा उद्योगपति इलन मस्कलगायत उच्च पदस्थ व्यक्तिहरूलाई सम्भावित लक्ष्यको सूचीमा राखेको आरोप छ।

यद्यपि ती सबै व्यक्तिहरू कार्यक्रमस्थलमा उपस्थित थिए वा थिएनन् भन्नेबारे अधिकारीहरूले विस्तृत जानकारी दिएका छैनन्।

अनुसन्धानका क्रममा संदिग्धहरूले ‘भ्यानगार्ड अफ द ओल्ड’ नामक अनलाइन समूहमार्फत सम्पर्क विस्तार गरेको पाइएको छ। त्यसपछि उनीहरू ‘सिग्नल’ जस्ता सुरक्षित सन्देश आदानप्रदान प्लेटफर्ममार्फत योजनाबद्ध गतिविधिमा संलग्न भएको आरोप लगाइएको छ।

एफबीआईले यो योजनाबारे जानकारी प्राप्त गर्न एक संदिग्धका परिवारबाट प्राप्त सूचनाले महत्वपूर्ण भूमिका खेलेको जनाएको छ। संदिग्ध टाइसेन प्रोपरकी आमाले आफ्ना छोराले ठूलो परिमाणमा हतियार खरिद गरेको तथा शंकास्पद समूहसँग सम्पर्कमा रहेको जानकारी प्रहरीलाई दिएपछि अनुसन्धान अघि बढाइएको थियो।

सिक्रेट सर्भिसका उपनिर्देशक म्याट क्विनले यसलाई ‘गम्भीर सुरक्षा खतरा’ को रूपमा व्याख्या गरेका छन्। यद्यपि अनुसन्धान जारी रहेकाले उनले थप विवरण सार्वजनिक गर्न अस्वीकार गरेका छन्।

यस विषयमा प्रतिक्रिया दिँदै अमेरिकी राष्ट्रपति  ट्रम्पले आफूलाई प्रारम्भिक रूपमा यसबारे जानकारी नभएको बताएका छन्। फ्रान्समा आयोजित जी-७ शिखर सम्मेलनका क्रममा सञ्चारकर्मीहरूले सोधेको प्रश्नमा उनले आफूले यसबारे विस्तृत जानकारी नपाएको प्रतिक्रिया दिएका थिए।

दोषी ठहर भएमा पक्राउ परेका व्यक्तिहरूले अधिकतम आजीवन कारावास तथा ठूलो आर्थिक जरिवानाको सजाय भोग्नुपर्ने अवस्था आउन सक्छ। प्रारम्भिक सुनुवाइ यही जुन २९ का लागि तोकिएको छ।

पछिल्ला वर्षहरूमा अमेरिकामा राजनीतिक तथा वैचारिक चरमपन्थसँग सम्बन्धित हिंसात्मक घटनाहरू बढ्दो चिन्ताको विषय बन्दै गएको छ।