काठमाडौं। लालपूर्जा र नागरिकता उपलब्ध गराउन माग गर्दै नवलपरासी (बर्दघाट सुस्तापूर्व) को सुस्ता क्षेत्रका बासिन्दा काठमाडौं आइपुगेका छन्। आफ्नो समस्या समाधानका लागि सरकारको ध्यानाकर्षण गराउन उनीहरूले माइतीघर मण्डलामा अनिश्चितकालीन धर्ना सुरु गरेका हुन्।

सुस्तावासीका अनुसार प्रधानमन्त्रीको ‘नेपालले पनि भारतको सीमा मिचेको रहेछ’ भन्ने अभिव्यक्तिपछि भारतीय सशस्त्र सीमा बल (एसएसबी) ले सुस्ता क्षेत्रमा प्रवेश गरी स्थानीयलाई धम्क्याउने र मानसिक दबाब दिने गतिविधि बढाएको छ। विशेषगरी पछिल्ला दुई महिनायता भारतीय सुरक्षाकर्मीको हस्तक्षेप बढेको उनीहरूको गुनासो छ।

पहिलो चरणमा करिब ६० परिवारका प्रतिनिधि काठमाडौं आएका छन्। उनीहरूले लालपूर्जा, नागरिकता तथा सीमा क्षेत्रमा बसोबास गर्ने नेपालीको सुरक्षा सुनिश्चित गर्न सरकारसँग माग गरेका छन्।

आन्दोलनमा सहभागी एक स्थानीयले सरकारले आफ्ना मागप्रति बेवास्ता गरे दोस्रो चरणमा थप पीडित परिवार पनि काठमाडौं आएर आन्दोलनमा सहभागी हुने चेतावनी दिए।

उनले भने, ‘वर्षौंदेखि आफ्नै देशमा नागरिकता र लालपूर्जाविहीन भएर बाँचिरहेका छौं। अहिले त भारतीय सुरक्षाकर्मी गाउँमै आएर धम्क्याउन थालेका छन्। भोलि कुनै अप्रिय घटना भयो भने हाम्रो ज्यानको सुरक्षा कसले गर्ने भन्ने चिन्ता बढेको छ।’

सुस्तावासीहरूले आफ्ना माग तत्काल सम्बोधन गर्न र सीमा क्षेत्रमा नेपाली नागरिकको सुरक्षा तथा अधिकार सुनिश्चित गर्न सरकारसँग आग्रह गरेका छन्।