काठमाडौं। नेपालमा कृत्रिम बुद्धिमत्ता (आर्टिफिसियल इन्टेलिजेन्स–एआई) सम्बन्धी पूर्वाधार स्वदेशमै उपलब्ध गराउने उद्देश्यसहित ‘यतिक्लाउड डट एआई’ सेवा औपचारिक रूपमा सञ्चालनमा आएको छ।

शुक्रबार साँझ आयोजित कार्यक्रममा यसको सार्वजनिक शुभारम्भ गरिएको हो।

नेपालको डाटा सेन्टर तथा क्लाउड सेवा प्रदायक ‘डाटाहब’ले अमेरिकी कम्पनी ‘होस्टेड एआई’सँगको सहकार्यमा यो सेवा सुरु गरेको जनाएको छ। कम्पनीका अनुसार नेपालमा एआई प्रविधिको विकास, अनुसन्धान र प्रयोगलाई सहज बनाउन आवश्यक कम्प्युटिङ पूर्वाधार उपलब्ध गराउने लक्ष्यसहित प्लेटफर्म सञ्चालनमा ल्याइएको हो।

‘यतिक्लाउड डट एआई’मार्फत एआई क्षेत्रमा काम गरिरहेका कम्पनी, शैक्षिक संस्था, अनुसन्धानकर्ता, अध्यापक तथा विद्यार्थीले आवश्यक एआई इन्फ्रास्ट्रक्चर स्वदेशबाटै प्रयोग गर्न सक्ने कम्पनीको दाबी छ। यसले अनुसन्धान, मोडेल विकास, परीक्षण तथा विभिन्न एआई परियोजनामा काम गर्न आवश्यक कम्प्युटिङ स्रोत उपलब्ध गराउने अपेक्षा गरिएको छ।

कम्पनीले ‘नेपालको आफ्नै एआई इन्फ्रास्ट्रक्चर : जहाँ पनि, जहिले पनि, जति पनि’ भन्ने नारासहित सेवा सञ्चालनमा ल्याएको हो। कार्यक्रममा सहभागी प्रविधि क्षेत्रका विज्ञहरूले नेपालमै एआई पूर्वाधार निर्माण र विस्तारका लागि यस्तो पहल महत्त्वपूर्ण हुने धारणा व्यक्त गरेका थिए।

डाटाहबका अनुसार स्वदेशमै एआई पूर्वाधार उपलब्ध हुँदा नेपाली शैक्षिक संस्था, स्टार्टअप, निजी क्षेत्र तथा अनुसन्धानकर्ताले विदेशमा निर्भर हुनुपर्ने अवस्था क्रमशः घट्ने अपेक्षा गरिएको छ।

कम्पनीले आगामी दिनमा एआई प्रविधिमा आधारित सेवा र अनुसन्धानलाई थप सशक्त बनाउन विभिन्न संस्थासँग सहकार्य विस्तार गर्ने जनाएको छ।