काठमाडौं। नेपाली कांग्रेस फुटको संघारमा पुगेको छ।

देउवा पक्षले अघि सारेको ७ बुँदे प्रस्तावका दुई विषयमा सहमति नजुटेपछि पार्टीभित्रको शक्ति संघर्ष नयाँ मोडमा पुगेको हो।

संस्थापन पक्षले १४औँ महाधिवेशनबाट निर्वाचित १११ केन्द्रीय समिति सदस्यलाई स्वतः अहिलेको केन्द्रीय समितिमा समेट्नुपर्ने र क्रियाशील सदस्यताको नवीकरण नगरेका व्यक्तिलाई पनि महाधिवेशन प्रक्रियामा सहभागी गराउनुपर्ने प्रस्तावलाई स्वीकार गर्न नसकिने स्पष्ट सन्देश दिएको छ। सभापति गगन थापाका अनुसार यी दुवै विषय पार्टी विधानविपरीत भएकाले आफूले चाहेर पनि कार्यान्वयन गर्न सकिँदैन।

थापाले क्रियाशील सदस्यताको नवीकरण नगरी महाधिवेशनमा सहभागी गराउनु अव्यावहारिक, अराजनीतिक र विधानविपरीत हुने तर्क गरेका छन्। विशेष महाधिवेशनबाट नयाँ केन्द्रीय समिति गठन भइसकेपछि पुरानो समितिका सबै सदस्यलाई पुनः समेट्ने व्यवस्था पनि विधानमा नरहेको जिकिर थापाले गरेका छन्।

उता, इतर पक्षले भने संस्थापन पक्षले सहमतिका लागि आवश्यक इच्छाशक्ति नदेखाएको बताएको छ। चुनदेवीमा बसेको बैठकपछि नेता मीन विश्वकर्माले राष्ट्रिय भेलाको मिति र मोडालिटी चाँडै तय गरिने जानकारी दिए। उनका अनुसार अहिलेको परिस्थितिमा ‘एकता महाधिवेशन’ हुने सम्भावना कमजोर बन्दै गएको छ। सहमति नभए इतर पक्षले १५औँ महाधिवेशन आफ्नै ढङ्गले अघि बढाउने रणनीति बनाएको छ।

यसबीच डा. शेखर कोइरालाले भने मध्यमार्गी विकल्प खोज्नुपर्ने धारणा राखेका छन्। केन्द्रीय समितिमा सबैलाई समेट्न नसके छुट्टै संयन्त्र बनाएर व्यवस्थापन गर्न सकिने उनको सुझाव छ।

कांग्रेसभित्र अहिलेको विवाद व्यक्तिको व्यवस्थापनभन्दा पनि पार्टी विधानको व्याख्या, संगठनात्मक संरचना र शक्ति सन्तुलनसँग जोडिएको देखिन्छ।

आगामी केही दिनमा हुने वार्ता सफल भए महाधिवेशन सहमतिमै अघि बढ्न सक्छ, अन्यथा कांग्रेस फेरि गुटीय प्रतिस्पर्धाको बाटोमा जाने संकेत देखिएको छ।

भिडियो: