बाजुरा । बाजुराको हिमाली गाउँपालिकामा सोमबार भएको जिप दुर्घटनामा घाइते भएका थप दुई जनाको उपचारका क्रममा मृत्यु भएको छ। दुर्घटनापछि अस्पतालमा उपचाररत उनीहरूको ज्यान गएसँगै घटनाले थप दुःखद मोड लिएको हो।

जिल्ला प्रहरी कार्यालय बाजुराका अनुसार मृत्यु हुनेमा हिमाली गाउँपालिका–२ निवासी ४० वर्षीय धर्मलाल बुढा र हुम्लाको ताजाकोट गाउँपालिका–५ निवासी करिब ४० वर्षीय अम्मर सिंह बुढा रहेका छन्। दुवैको कोल्टी आधारभूत अस्पतालमा उपचार भइरहेका बेला मृत्यु भएको प्रहरीले जनाएको छ।

प्रहरीका अनुसार दुर्घटना सोमबार दिउँसो करिब १:२५ बजे हिमाली गाउँपालिका–५ को कुवाडी–क्युडी भित्री कच्ची सडकखण्डमा भएको थियो। धुलाचौरबाट दुधिला खोलातर्फ जाँदै गरेको सु.प.प्र.०१–००१ ज १८७८ नम्बरको जिप माथिल्लो मोडमा चालकको नियन्त्रणबाट बाहिरिएर करिब १० मिटर तल रहेको अर्को मोडमा खस्दा दुर्घटना भएको प्रारम्भिक अनुसन्धानबाट खुलेको छ।

दुर्घटनामा घाइते भएका अन्य सात जनाको कोल्टी आधारभूत अस्पतालमा उपचार भइरहेको जिल्ला प्रहरी कार्यालय बाजुराका प्रवक्ता प्रहरी निरीक्षक नरेश शाहीले जानकारी दिएका छन्। घटनाबारे थप अनुसन्धान जारी रहेको प्रहरीले जनाएको छ।