काठमाडौं। श्रम संस्कृति पार्टीका अध्यक्ष हर्कराज साम्पाङ जनकपुरधाम आउने कार्यक्रमअघि जानकी मन्दिर परिसरमा तनाव उत्पन्न भएको छ।

साम्पाङको स्वागतका लागि पुगेका पार्टीका नेता तथा कार्यकर्तालाई हिन्दु सम्राट सेनासम्बद्ध समूहले लखेटेको बताइएको छ।

साम्पाङ मंगलबार जानकी मन्दिरमा दर्शन गर्न जनकपुर आउने कार्यक्रम रहेको थियो। उनी आउनुअघि मन्दिर परिसरमा भेला भएका उनका समर्थक र विरोधी समूहबीच विवादको स्थिति सिर्जना भएको हो।

हिन्दु सम्राट सेनाले साम्पाङले विगतमा गाईको मासु खाने विषयमा दिएको अभिव्यक्तिको विरोध गर्दै उनलाई जानकी मन्दिर प्रवेश गर्न नदिने चेतावनी दिएको थियो।

घटनापछि साम्पाङले सामाजिक सञ्जालमार्फत प्रतिक्रिया दिँदै आफूविरुद्ध अनावश्यक विवाद सिर्जना गरिएको बताएका छन्। उनले ‘गाई कसले खाएको रैछ ? गाई खानेलाई मन्दिरमा पस्न नदिने भनेको देखें ! यो कसले कस्तो राजनीति गर्न खोजेको रैछ ? जय जानकी मन्दिर !’ भन्दै फेसबुकमा स्टाटस लेखेका छन्।

यसअघि उनले अर्को स्टाटसमार्फत जनकपुरमा तनाव भएको उल्लेख गर्दै गृहमन्त्रीसँग सम्पर्क गर्न खोज्दा फोन बन्द रहेको दाबी पनि गरेका थिए। उनले पुरानो विषय र धर्मको नाममा विवाद सिर्जना गरिएको उल्लेख गर्दै आफ्ना कार्यकर्तालाई संयमता अपनाउन आग्रह गरेका छन्।

श्रम संस्कृति पार्टीले मंगलबार जनकपुरमा साधारण सभा तथा पार्टी प्रवेश कार्यक्रम आयोजना गरेको जनाएको छ। घटनापछि मन्दिर परिसर र आसपासको क्षेत्रमा सुरक्षा व्यवस्था कडा पारिएको छ।