काठमाडौं। विद्युतीय अपराधसम्बन्धी कसुरमा पक्राउ परेकी वेदिका केसी हाजिर जमानीमा रिहा भएकी छन्।

सरकारी वकिलको कार्यालयको लिखित सहमतिमा उनलाई शुक्रबार उपस्थित हुने सर्तमा रिहा गरिएको साइबर ब्युरोले जनाएको छ।

साइबर ब्युरोका प्रवक्ता प्रहरी उपरीक्षक दिलीपकुमार गिरीका अनुसार केसीविरुद्धको अनुसन्धान भने जारी रहेको छ। ब्युरोले जिल्ला अदालत काठमाडौंबाट एक दिनको म्याद लिएर अनुसन्धान प्रक्रिया अघि बढाएको थियो।

आफूलाई सामाजिक अभियन्ताका रूपमा चिनाउँदै आएकी केसीलाई बिहीबार काठमाडौंको जोरपाटी क्षेत्रबाट पक्राउ गरिएको थियो। सोही दिन आवश्यक कानुनी प्रक्रिया पूरा गरेपछि उनलाई हाजिर जमानीमा छाडिएको हो।

पछिल्लो समय केसीले सामाजिक सञ्जाल र विभिन्न टेलिभिजन कार्यक्रममार्फत धर्मभित्र देखिएका विकृति, अन्धविश्वास तथा तन्त्र–मन्त्रका नाममा हुने ठगी र शोषणविरुद्ध आफ्ना धारणा सार्वजनिक गर्दै आएकी थिइन्।

उनले सामाजिक सञ्जाल तथा विभिन्न युट्युबहरूमार्फत राधिका दासीविरुद्ध विभिन्न अफवाह फैलाएको आरोप छ । उनका केही अभिव्यक्तिले आफ्नो चरित्रमा आघात पुगेको दाबी गर्दै चर्चित कथावाचिका दासीले उनीविरुद्ध कानुनी प्रक्रिया अघि बढाउने सार्वजनिक रूपमा बताएकी थिइन्।

व्यवसायिक पृष्ठभूमिसमेत रहेकी केसी जीबीएस एजुकेसनल कन्सल्टेन्सीकी सञ्चालक हुन्। उनी धर्म, संस्कार तथा तन्त्रविद्याका नाममा हुने दुरुपयोगविरुद्ध आवाज उठाउँदै आएको दाबी गर्दै आएकी छन्।

हाल केसीमाथि लागेको विद्युतीय अपराधसम्बन्धी आरोपको अनुसन्धान जारी रहेको साइबर ब्युरोले जनाएको छ।