काठमाडौं। नेपालमा अनैतिक गतिविधिमा संलग्न हुन विदेशी महिलाको आगमन बढ्दै गएको प्रहरीले जनाएको छ।

जिल्ला प्रहरी परिसर काठमाडौंले आर्थिक वर्ष २०८२/८३ को वार्षिक कार्यसम्पादन सार्वजनिक गर्दै अनैतिक गतिविधिमा संलग्न ५७ जना विदेशी महिला पक्राउ परेको जानकारी दिएको हो।

जिल्ला प्रहरी परिसर काठमाडौंका प्रवक्ता एसपी पवनकुमार भट्टराईका अनुसार पक्राउ परेकामध्ये ४७ जनालाई आवश्यक कानुनी प्रक्रिया पूरा गरेपछि अध्यागमन विभागमार्फत सम्बन्धित देश फर्काइएको (डिपोर्ट) छ। बाँकी १० जनाको डिपोर्ट प्रक्रिया जारी रहेको उनले बताए।

प्रहरीका अनुसार पछिल्लो समय विशेषगरी बैंककसहित केही अफ्रिकी मुलुकबाट आएका महिलाहरू अनैतिक गतिविधिमा संलग्न हुने क्रम बढ्दो देखिएको छ। यसलाई नियन्त्रण गर्न प्रहरीले होटल, गेस्टहाउस र अन्य शंकास्पद स्थानमा निगरानी तथा विशेष अपरेशनलाई तीव्र बनाएको जनाएको छ।

प्रहरीले मानव बेचबिखन तथा यौन शोषणसँग सम्बन्धित सम्भावित सञ्जालमाथि पनि अनुसन्धान जारी रहेको बताउँदै यस्ता गतिविधि नियन्त्रणका लागि सम्बन्धित निकायसँग समन्वय गरेर कारबाहीलाई थप प्रभावकारी बनाइने जनाएको छ।