काठमाडौं । पूर्वाधार विकासमन्त्री सुनिल लम्सालले नागढुंगा–सिस्नेखोला सुरुङमार्गको शिलान्याससँग सम्बन्धित पुरानो शिलालेख पुनःस्थापना गरिने बताएका छन्। सुरुङमार्ग उद्घाटनपछि सञ्चारकर्मीसँग कुरा गर्दै उनले विगतका योगदानलाई सम्मान गर्दै सरकारले शिलालेख पुनःस्थापना गर्ने स्पष्ट पारे।

सुरुङमार्ग उद्घाटनसँगै राखिएको नयाँ शिलालेखमा तत्कालीन प्रधानमन्त्री केपी शर्मा ओलीको नाम नराखिएको भन्दै राजनीतिक वृत्तमा प्रश्न उठेपछि मन्त्री लम्सालले त्यसबारे स्पष्टीकरण दिएका हुन्।

उनले पुरानो शिलालेख जानाजानी हटाइएको नभई निर्माणका क्रममा आवश्यक संरचना निर्माण गर्नुपर्ने भएकाले सुरक्षित रूपमा हटाइएको दाबी गरे।

‘हामीले विगतलाई सम्मान गर्नुपर्छ र गर्छौं पनि। केही कुरा मिडियामा आएजस्तो होइन,’ मन्त्री लम्सालले भने, ‘सुरुङमार्ग निर्माणका क्रममा शिलालेख रहेको स्थानमा संरचना बनाउनुपर्ने भएकाले त्यसलाई सुरक्षित रूपमा सडक विभागमा राखिएको थियो। पछि जेन–जी आन्दोलनका क्रममा विभागको भवनमा आगलागी हुँदा त्यो शिलालेख हराएको रहेछ।’

उनले सरकारले पुरानो शिलालेखको ऐतिहासिक महत्वलाई स्वीकार गर्दै त्यसलाई पुनःस्थापना गर्ने तयारी गरेको जानकारी दिए। विगतका सरकार र नेतृत्वको योगदानलाई सम्मान गर्दै आयोजना निर्माणसँग जोडिएका सबै पक्षको इतिहास संरक्षण गरिने उनको भनाइ थियो।

नागढुंगा–सिस्नेखोला सुरुङमार्गको शिलान्यास तत्कालीन प्रधानमन्त्री केपी शर्मा ओलीले गरेका थिए भने मुख्य सुरुङको ‘ब्रेकथ्रु’ तत्कालीन प्रधानमन्त्री पुष्पकमल दाहाल ‘प्रचण्ड’को उपस्थितिमा गरिएको थियो। उद्घाटनका क्रममा राखिएको नयाँ शिलालेखमा भने वर्तमान पूर्वाधार विकासमन्त्री सुनिल लम्सालको नाम उल्लेख भएपछि पुरानो शिलालेख हटाइएको विषयले राजनीतिक बहस चर्किएको थियो।

मन्त्री लम्सालले भने शिलालेख हराएको घटनाको वास्तविकता सार्वजनिक गर्दै त्यसलाई पुनःस्थापना गरेर विगतका योगदानलाई उचित सम्मान गरिने बताएका छन्।