दाङ। सुरक्षित विद्युत् सेवा अभियान–देउखुरीले विद्युत् सेवा सुधारका दुई प्रमुख माग अघि सार्दै नेपाल विद्युत् प्राधिकरण, लमही वितरण केन्द्रलाई ज्ञापनपत्र बुझाएको छ।

अभियानका संयोजक सन्देश भण्डारी क्षेत्रीको नेतृत्वमा बुझाइएको ज्ञापनपत्रमा लमही–भालुवाङ ३३ केभी प्रसारण लाइन तत्काल निर्माण गर्नुपर्ने र देउखुरी क्षेत्रमा छुट्टै ग्रिड सबस्टेसन स्थापना गर्नुपर्ने माग गरिएको छ।

ज्ञापनपत्रमा देउखुरीको जनसंख्या, उद्योग–व्यवसाय र विद्युत् खपत बढ्दै जाँदा हालको पूर्वाधारले पर्याप्त सेवा दिन नसकेको उल्लेख गरिएको छ। बारम्बार विद्युत् अवरोध, कम भोल्टेज र प्राविधिक समस्याका कारण सर्वसाधारण, उद्योग, कृषि तथा व्यवसाय प्रभावित भइरहेको अभियानको भनाइ छ।

अभियानले समयमै आवश्यक पूर्वाधार निर्माण नगरे भविष्यमा विद्युत् आपूर्तिमा थप जटिलता आउने चेतावनी दिँदै सम्बन्धित निकायलाई माग पूरा गर्न आग्रह गरेको छ।

ज्ञापनपत्रमा सुरक्षित विद्युत् सेवा अभियान–देउखुरीका पदाधिकारी तथा स्थानीय सरोकारवालाहरूको हस्ताक्षर रहेको छ।