काठमाडौं। सुनसरीको देवानगञ्ज गाउँपालिका–३, कप्तानगञ्ज क्षेत्रमा दुई समुदायबीच भएको हिंसात्मक झडपपछि सुरक्षा व्यवस्था थप कडा पारिएको छ।

बुधबार बिहानदेखि नेपाली सेनाले हेलिकोप्टरमार्फत हवाई गस्ती सुरु गरेको छ भने नेपाल प्रहरी, सशस्त्र प्रहरी बल र नेपाली सेनाले संयुक्त रूपमा प्रभावित क्षेत्रमा सुरक्षा निगरानी तीव्र बनाएका छन्।

जिल्ला प्रशासन कार्यालयले जारी गरेको कर्फ्यु आदेश अझै कायम रहेको छ। संवेदनशील क्षेत्रमा सुरक्षाकर्मीको उपस्थितिसमेत बढाइएको छ भने ड्रोनमार्फत पनि अवस्थाको निरन्तर अनुगमन भइरहेको सुरक्षा निकायले जनाएको छ।

यसैबीच, घटनाको छानबिनका लागि सरकारले गठन गरेको पाँच सदस्यीय समिति र जिल्ला सुरक्षा समितिको टोली बुधबार घटनास्थल पुगेको छ। टोलीले घटनास्थलको स्थलगत निरीक्षण गर्नुका साथै गोली लागेर ज्यान गुमाएका २४ वर्षीय ओमप्रकाश मेहताका परिवार, घाइते र स्थानीय बासिन्दासँग भेटघाट गरी घटनाबारे जानकारी संकलन गरेको छ।

सरकारले घटनाको सत्यतथ्य पत्ता लगाउन पाँच सदस्यीय छानबिन समिति गठन गर्दै एक साताभित्र प्रतिवेदन पेस गर्न निर्देशन दिएको छ। समितिले घटनाको कारण, सुरक्षा व्यवस्थापन तथा सम्भावित कमजोरीका विषयमा अध्ययन गरी सरकारलाई सुझाव दिनेछ।

प्रशासनले स्थानीयवासीलाई संयमता अपनाउन, अफवाहमा विश्वास नगर्न तथा शान्ति–सुरक्षा कायम राख्न सहयोग गर्न आग्रह गरेको छ। प्रभावित क्षेत्रमा अवस्था क्रमशः सामान्य बन्दै गए पनि सुरक्षा सतर्कता भने यथावत् राखिएको छ।

तस्वीरहरू: