काठमाडौं। दुई साता स्थगित भएर बसेको प्रतिनिधिसभाको बैठकमा प्रधानमन्त्री वालेन्द्र शाह (बालेन) र गृहमन्त्री सुधन गुरुङ अनुपस्थित भएपछि सांसदहरूले दुवैको खोजी गरेका छन्।

सुनसरीको देवानगञ्ज–३, कप्तानगञ्जमा भएको हिंसात्मक घटनामा एक युवकको मृत्यु भएपछि सरकारले घटनाबारे संसद्मा जवाफ दिनुपर्ने माग उठिरहेका बेला प्रधानमन्त्री र गृहमन्त्री नै बैठकमा उपस्थित नभएका हुन्।

प्रतिनिधिसभाको बैठक सुरु हुने समयमा प्रधानमन्त्री शाहले सुरक्षा समिति बैठक बोलाएका थिए। सोही कारण उनी संसद् बैठकमा उपस्थित नभएको बताइएको छ। गृहमन्त्री गुरुङ पनि बैठकमा अनुपस्थित रहे।

बैठकमा नेपाली कांग्रेसकी सांसद बासना थापाले संकटका बेला सरकारको नेतृत्वको भूमिकामाथि प्रश्न उठाइन्। उनले एक नेपाली युवाको मृत्यु हुँदा सरकारको संवेदनशीलता कहाँ हरायो भन्दै प्रधानमन्त्रीलाई जवाफ दिन आग्रह गरिन्।

‘तपाईंले लगाएको कालो चस्माबाट मृत्यु र पीडाको रङ पनि फरक-फरक देखिन्छ र ?’ भन्दै उनले प्रधानमन्त्री शाहप्रति प्रश्न गरिन्।

थापाले नेतृत्व केवल प्रशासन सञ्चालन गर्ने विषय नभएको भन्दै संकटका बेला राष्ट्रको मनोबल सम्हाल्ने जिम्मेवारी पनि प्रधानमन्त्रीको भएको बताइन्। समाज डर, तनाव र अविश्वासबाट गुज्रिरहेका बेला प्रधानमन्त्रीको मौनता आफैंमा एउटा सन्देश बन्न सक्ने उनको भनाइ थियो।

उनले सुनसरी घटनाबारे प्रधानमन्त्रीले मौनता तोड्नुपर्ने र गृहमन्त्रीले पनि घटनाप्रति गम्भीर संवेदनशीलता देखाउनुपर्ने बताइन्।

संसद्मा एमाले, नेपाली कम्युनिस्ट पार्टी, श्रम संस्कृति पार्टी र राष्ट्रिय प्रजातन्त्र पार्टीका सांसदहरूले पनि प्रधानमन्त्री र गृहमन्त्रीको अनुपस्थितिमाथि प्रश्न उठाए।

कांग्रेस सांसद रेखाकुमारी यादवले सुनसरीमा यति गम्भीर घटना हुँदा गृहमन्त्री कहाँ हराएको भन्दै प्रश्न गरिन्।

सांसदहरूले घटनाको वास्तविकता, गोली चल्नुको कारण, सुरक्षा व्यवस्थापनमा भएको कमजोरी तथा मृतक र घाइतेको विषयमा सरकारले सदनलाई स्पष्ट जानकारी दिनुपर्ने माग गरेका छन्।

विशेषगरी घटनाको जिम्मेवारी कसले लिने र घटनाको निष्पक्ष छानबिन कसरी अघि बढ्छ भन्ने विषयमा सरकारको जवाफ मागिएको छ।