काठमाडौं। सुनसरीको देवानगञ्ज गाउँपालिका-३, कप्तानगञ्जमा भएको घटनाको विरोधमा मधेशका विभिन्न जिल्लामा प्रदर्शन फैलिन थालेपछि सिरहाको गोलबजार क्षेत्रमा अनिश्चितकालीन कर्फ्यू आदेश जारी गरिएको छ।

जिल्ला प्रशासन कार्यालय सिरहाले जिल्लाको सुरक्षा अवस्थाको विश्लेषण तथा जिल्ला सुरक्षा समितिको निर्णयका आधारमा कर्फ्यू लगाइएको जनाएको छ।

प्रमुख जिल्ला अधिकारी सुरेन्द्र पौडेलको आदेशअनुसार दिउँसो २ बजेदेखि अर्को आदेश नभएसम्म गोलबजार नगरपालिकाको निश्चित क्षेत्रमा आवतजावत तथा भेला हुन पूर्ण रूपमा रोक लगाइएको छ।

कर्फ्यू क्षेत्रको पूर्वमा कसाह खोला, पश्चिममा चोहर्वा चोक, उत्तरमा सैनिक चोक र दक्षिणमा राजेन्द्रप्रसाद राजकीय बहुमुखी क्याम्पस आसपासको क्षेत्र तोकिएको छ।

कर्फ्यू लागू भएसँगै गोलबजारका सडक तथा बजार क्षेत्रमा सुरक्षा तैनाथीसमेत बढाइएको छ। प्रशासनले सुरक्षा अवस्था र परिस्थितिको मूल्यांकन गर्दै आवश्यक निर्णय लिने जनाएको छ।