काठमाडौं। प्रधानमन्त्री बालेन्द्र शाहको अध्यक्षतामा राष्ट्रिय सुरक्षा परिषद्को ४३औँ बैठक सम्पन्न भएको छ। बिहीबार प्रधानमन्त्री तथा मन्त्रिपरिषद्को कार्यालय, सिंहदरबारमा बसेको बैठकले सुनसरी घटनासहित राष्ट्रिय, अन्तर्राष्ट्रिय र क्षेत्रीय सुरक्षा अवस्थाबारे समीक्षा गरेको छ।

बैठकपछि परिषद्का सदस्य-सचिव तथा रक्षा मन्त्रालयका सचिव केदारनाथ शर्माले सुनसरीमा भएको घटनाको विश्लेषण गर्दै यस्ता घटना भविष्यमा दोहोरिन नदिन सम्बन्धित सबै निकायलाई सक्रिय र समन्वयात्मक रूपमा काम गर्न निर्देशन दिने निर्णय भएको जानकारी दिए।

उनका अनुसार केन्द्र, प्रदेश र स्थानीय सरकारबीच प्रभावकारी समन्वय गर्दै सम्भावित सुरक्षा चुनौतीलाई समयमै पहिचान गरी रोकथामका लागि सक्रिय रूपमा काम गर्ने निर्णय बैठकले गरेको छ।

बैठकले राष्ट्रिय तथा क्षेत्रीय सुरक्षा अवस्थाको समग्र समीक्षा गर्दै शान्ति–सुरक्षा सुदृढ पार्ने विषयमा पनि छलफल गरेको सचिव शर्माले बताए।

त्यसैगरी, विपद् प्रतिकार्यलाई प्रभावकारी बनाउने विषयमा पनि बैठकले आवश्यक निर्णय गरेको छ। खोज, उद्धार र राहतका कामलाई थप व्यवस्थित, छिटोछरितो र प्रभावकारी बनाउँदै विपद्को समयमा नागरिकलाई समयमै सेवा-सुविधा उपलब्ध गराउने विषयमा सम्बन्धित निकायलाई सक्रिय हुन निर्देशन दिइएको उनले जानकारी दिए।