काठमाडौं। अन्तिमराजा ज्ञानेन्द्र शाहले सुनसरी घटनापछि देशका विभिन्न क्षेत्रमा देखिएको तनावप्रति चिन्ता व्यक्त गर्दै सामाजिक तथा धार्मिक सद्भाव कायम राख्न सबै नेपालीलाई आग्रह गरेका छन्।

निर्मल निवासस्थित संवाद सचिवालयमार्फत जारी सद्भाव सन्देशमा शाहले नेपाल बहुजातीय, बहुभाषिक, बहुधार्मिक र बहुसांस्कृतिक मुलुक भएकाले विविधताभित्रको एकता नै नेपालको पहिचान र गौरव भएको बताएका छन्।

नेपाली समाज परापूर्वकालदेखि नै आपसी प्रेम, सद्भाव र सहअस्तित्वका आधारमा अघि बढ्दै आएको उल्लेख गर्दै उनले सामाजिक, धार्मिक तथा सांस्कृतिक सद्भावमा खलल पुग्ने कुनै पनि गतिविधि नगर्न आग्रह गरेका छन्।

सुनसरीका विभिन्न गाउँबस्तीमा भएको द्वन्द्व र विवादका कारण जनधनको क्षति हुनुका साथै त्यसको प्रभाव कोशी क्षेत्र हुँदै तराईका विभिन्न भूभागसम्म फैलिएकोप्रति उनले दुःख व्यक्त गरेका छन्।

नेपाल सबै समुदायबीचको सामञ्जस्यका कारण परिचित रहेको उल्लेख गर्दै शाहले यस्ता अवाञ्छित घटना मुलुकका मौलिक मूल्य र मान्यताविपरीत रहेको बताएका छन्।

उनले देशका जुनसुकै भूभागमा बसोबास गर्ने नेपालीलाई एकताबद्ध हुँदै मेलमिलाप, सहअस्तित्व र सामाजिक सद्भाव कायम राख्न आग्रह गरेका छन्।

अहिलेको संवेदनशील अवस्थामा नेपालीबीचको एकता र सद्भाव नै प्रमुख आवश्यकता रहेको उनको सन्देश छ।