काठमाडौं। जनकपुरमा दुई पक्षबीच झडपको स्थिति सिर्जना भएपछि प्रहरीले अश्रुग्यास प्रहार गरेको छ।

जनकपुर उपमहानगरपालिका–८ स्थित पगलाबाबा धर्मशाला नजिक भेला भएका करिब ५ सय प्रदर्शनकारीलाई हटाउने क्रममा प्रहरीले करिब ४१ सेल अश्रुग्यास प्रहार गरेको जिल्ला प्रहरी कार्यालय धनुषाका एक अधिकृतले बताएका छन्।

प्रहरीका अनुसार हिन्दु धर्मावलम्बीहरू धर्मशालामा भेला भएर नजिकैको मुस्लिम बस्तीमा प्रवेश गर्न खोजेपछि प्रहरीले रोकेको थियो। त्यसक्रममा तनाव बढेपछि स्थिति नियन्त्रणमा लिन अश्रुग्यास प्रहार गरिएको हो।

घटनामा दुई जना प्रदर्शनकारी घाइते भएका छन्। झडप नियन्त्रण गर्ने क्रममा तीन जना प्रहरीसमेत घाइते भएको प्रहरीले जनाएको छ।