काठमाडौं। नेपाली कांग्रेसका राष्ट्रिय सभा सदस्य रञ्जित कर्णले सुनसरीको देवानगञ्जमा भएको हिंसात्मक घटना तथा तराई-मधेसमा बढ्दो तनावलाई लिएर सरकारको कडा आलोचना गरेका छन्।

उनले प्रधानमन्त्री बालेन्द्र शाह र गृहमन्त्रीले नैतिक जिम्मेवारी लिँदै तत्काल राजीनामा दिनुपर्ने माग गरेका छन्।

शुक्रबार राष्ट्रिय सभाको बैठकमा बोल्दै सांसद कर्णले सरकारको गैरजिम्मेवारीपनका कारण देश गम्भीर दुर्घटनातर्फ धकेलिएको आरोप लगाए। उनले आफ्नो गृहजिल्ला सिरहाको अवस्था निकै भयावह बनेको भन्दै त्यहाँ नागरिक त्रासमा बाँच्नुपरेको बताए।

‘घर सम्झिन्छु, चारैतिर रगत बगिरहेको छ। काकालाई फोन गर्दा घरबाट निस्कने अवस्था छैन भन्नुहुन्छ, गोली चलिरहेको छ,’ कर्णले भने। उनले सिरहामा गणेश यादवको मृत्यु भएको र दर्जनौँ मानिस घाइते भएको उल्लेख गर्दै यस्तो पीडादायी अवस्थामा आफूलाई प्राविधिक विषयमा बोल्न इच्छा नरहेको बताए।

कर्णले सुनसरीको देवानगञ्जमा भएको घटनाबारे सरकारलाई एक महिनाअघिदेखि नै जानकारी रहेको दाबी गरे। तर, गृह मन्त्रालय र स्थानीय प्रशासनले समयमै आवश्यक चासो नदिँदा परिस्थिति गम्भीर बनेको उनको आरोप छ।

उनले प्रधानमन्त्री शाह जनतासँग संवाद गर्न अनिच्छुक देखिएको र गृहमन्त्रीले पनि गम्भीर समस्यामा अपेक्षित संवेदनशीलता नदेखाएको आरोप लगाए।

समस्या समाधानका लागि बल प्रयोगभन्दा संवाद र छलफलको बाटो रोज्नुपर्नेमा जोड दिँदै कर्णले दमनबाट कुनै पनि समस्याको स्थायी समाधान नहुने बताए।

उनका अनुसार सम्बन्धित समुदाय र सरोकारवालाबीच संवाद तथा बैठकमार्फत समाधान खोज्नुपर्ने थियो।

सांसद कर्णले राज्यको गोलीबाट नागरिकको मृत्यु भएको अवस्थामा प्रधानमन्त्री र गृहमन्त्रीले राजनीतिक तथा नैतिक जिम्मेवारी लिनुपर्ने बताए।

उनले विगतमा यही सरकार तथा नेतृत्वले स्थापित गरेको नजिर स्मरण गराउँदै त्यसैका आधारमा अहिले प्रधानमन्त्री र गृहमन्त्रीले राजीनामा दिनुपर्ने तर्क गरे।

‘राज्यको गोलीबाट नागरिकको मृत्यु भएमा प्रधानमन्त्री र गृहमन्त्रीले जिम्मेवारी लिनुपर्छ भन्ने नजिर उहाँहरूले नै स्थापित गर्नुभएको हो,’ कर्णले भने, ‘त्यही नजिरका आधारमा अब प्रधानमन्त्री बालेन्द्र शाह र गृहमन्त्रीले तत्काल राजीनामा दिएर मार्ग प्रशस्त गर्नुपर्छ।’

कर्णले सरकारले गठन गर्ने सामान्य छानबिन समितिप्रति आफूहरूको विश्वास नरहेको बताएका छन्। देवानगञ्जलगायतका घटनाको वास्तविकता बाहिर ल्याउन अधिकारसम्पन्न न्यायिक समिति गठन गर्नुपर्ने उनको माग छ।

उनले सरकारलाई दमनको बाटो छाडेर सर्वदलीय बैठक बोलाउन तथा नागरिक समाजसँग समन्वय गरी तनाव समाधान गर्न आग्रह गरे।

तराई-मधेसका विभिन्न जिल्लामा प्रदर्शन, झडप र हिंसात्मक घटना बढ्दै गएको अवस्थामा राजनीतिक संवादमार्फत तत्काल समाधान खोज्नुपर्ने कर्णको भनाइ छ।

यसअघि बिहीबार बसेको प्रतिनिधिसभा बैठकमा पनि सांसदहरूले पछिल्लो घटनालाई लिएर प्रधानमन्त्री र गृहमन्त्रीको राजीनामा माग गरेका थिए।